Президент Шавкат Мирзиёев халқ депутатлари Фарғона вилояти кенгашининг 5 февраль куни бўлиб ўтган навбатдан ташқари сессиясида мамлакат бош вазири Абдулла Ариповнинг фаолияти юзасидан фикр билдирди, дея хабар бермоқда «Дарё» мухбири Миролим Исажонов.
Давлат раҳбари ҳар бир вазир «Қашқадарёга нима қилдим, Наманганда нима бўлди, деб», ҳудудларда юриб, туманларнинг ривожланишига ёрдам бериши зарурлигини таъкидлади, чунки улар фақат «Тошкентга қоровулчилик қилиш учун» ҳукумат аъзоси этиб тайинланмайди. Президент чиқиши давомида ўзи Самарқанд вилоятига ҳоким, амалдаги бош вазир Абдулла Арипов эса Ўзбекистон почта ва телекоммуникациялар агентлиги директори бўлган 2001—2003 йилларни эслаб ўтган.
Самарқанд вилоятига ҳоким бўлганимда, бирорта вазир бормаган. Фақат Абдулла Ниғматович келиб, «Шавкат Миромонович, янги ҳоким бўлибсиз, менга топшириқ борми?», деган. «Тошкентда ишласангиз ҳам, инсофингиз бор экан-ку», деганман. Бошқа бирорта вазир бормаган.Абдулла Арипов 2016 йил декабридан бери Ўзбекистон бош вазири ҳисобланади. У 2002 йил майидан 2012 йил августига қадар — 10 йилдан ортиқ бош вазир ўринбосари лавозимида ишлаган. Шу билан бир вақтда 2005—2009 йилларда Ўзбекистон алоқа ва ахборотлаштириш агентлигини бошқарган. Арипов 2020 йил январида бош вазир лавозимига қайта тасдиқланган.Ўшанда вазир лавозимида ишласа-да, вилоятдаги бир қанча муаммоларни ечишда ёрдам берган. Ургутда телефон йўқлигини айтганман. Унинг ўзи уч кун шу масала билан шуғулланиб, масалани ҳал қилган. У пайтларда туманма-туман юриш мумкин эмас эди... Вазир шундай бўлиши керак.
Биламан, бу одам ўзгармайди. Чунки унинг касбига муносабати бошқача ва ҳалол. Бир пайтлар унга нисбатан адолатсизлик бўлган, туҳмат қилишган. Аммо шу пайтгача ёнимда олиб юрибман, ишончимни оқлаяпти.
Шу боис ҳамма вазирлар шошилмай, баландпарвоз гаплар айтмай, халқ ичида юриши ва ҳудудларнинг ўсиш нуқталарини аниқлаб, ривожланишда кўмаклашиши шарт.
Шавкат Мирзиёев, Ўзбекистон президенти
Шавкат Мирзиёев 2020 йил январидаги чиқишида Абдулла Ариповнинг 2016 йил сентябрида бош вазир ўринбосари лавозимига қайта тикланишини «адолат юзасидан» бўлганини маълум қилган эди. Президентнинг сўзларига кўра, бош вазир «ҳаётда кўп оғир туҳматларга қолган, лекин шуларни жасорат билан енгиб, ҳеч қачон синган эмас».
Изоҳ (0)