Бухоро шаҳридаги Ислом Каримов кўчасида қурилаётган 8 қаватли уйда содир бўлган портлаш оқибатида икки нафар ишчи енгил жароҳат олган. Бу ҳақда Фавқулодда вазиятлар вазирлиги маълум қилди.
Фото: «Дарё»
«Жабрланганлар шаҳар касалхонасига жойлаштирилди. Ҳозирги вақтга келиб ҳалок бўлганлар йўқлиги маълум бўлди», — дейилади хабарда.
Вазирлик маълумотига кўра, ҳодиса қурилиши тугалланмаган бинода газ-ҳаво аралашмасининг чақнаши оқибатида содир бўлган.
Фавқулодда вазиятлар вазирлигининг ҳудудий бошқармаси қутқарувчилари воқеа жойида иш олиб бормоқда.
Аввалроқ воқеа жойида бўлиб турган «Дарё» мухбири уй ёнидан ўтиб кетаётган автобус йўловчилари ҳам портлашдан зарар кўрганини маълум қилганди. «Дарё» мухбири олган дастлабки маълумотларга кўра, янги қурилаётган уйга кўчиб ўтиш ниятида хонадонга келган аёл уйда газ бор ёки йўқлигини текшириб кўришга уринган ва гугурт чаққан. Оқибатда газ тўлган хонадонда портлаш содир бўлган.
