Ўзбекистон Президенти Шавкат Мирзиёев 2 февраль куни Афғонистон делегацияси – мамлакат ташқи ишлар вазири Муҳаммад Ҳаниф Атмар ва президент администрацияси раҳбари Муҳаммад Шокир Коргарни қабул қилди. Бу ҳақда Президент матбуот хизмати хабар қилди.
Қайд этилишича, учрашувда кўп қиррали Ўзбекистон–Афғонистон ҳамкорлигини янада кенгайтиришнинг долзарб масалалари кўриб чиқилди.
Давлат раҳбари икки томонлама муносабатларнинг бугунги суръатини сақлаб қолиш ва аввал эришилган келишувларни амалга ошириш муҳим эканини алоҳида таъкидлади.
Таъкидланишича, бу борада сўз юритилганда, аввало, товар айирбошлаш ҳажмини ошириш ва уни яқин йилларда камида 2 миллиард долларга етказиш учун қулай шароитлар яратиш, саноат, энергетика, қишлоқ хўжалиги ва логистика соҳаларида кооперацияни кучайтириш, соғлиқни сақлаш, таълим ва маданият соҳаларида муҳим дастурларни амалга оширишни қайд этиш лозим.
Афғонистон делегацияси аъзолари Ўзбекистон Президентига кўрсатилган самимий қабул учун миннатдорлик билдириб, Афғонистон президенти Ашраф Ғанининг саломи ва энг эзгу тилакларини етказди.
Шунингдек, Ўзбекистоннинг Афғонистонда тинчлик ва барқарор тараққиётни таъминлашга қаратилган қатъий саъй-ҳаракатлари учун чуқур миннатдорлик билдирилди.
Маълум қилинишича, 2 февраль куни Тошкент шаҳрида халқаро молиявий институтлар раҳбарлари иштирокида ўтган Трансафғон темир йўлини қуриш лойиҳаси бўйича уч томонлама ишчи гуруҳ биринчи йиғилишининг самарали якунлари юксак баҳоланган.
Учрашувда томонлар ушбу лойиҳани тез фурсатда тайёрлаш ва амалга оширишни бошлаш, қабул қилинган «йўл харита»си асосида хорижий ҳамкорлар ва салоҳиятли инвесторларни фаол жалб қилиш муҳим эканини таъкидлади.
Аввалроқ Шавкат Мирзиёев Саудия Арабистони делегациясини қабул қилгани, Содиқ Сафоев Афғонистон—Ўзбекистон муносабатлари қанчалик муҳим эканлигини тушунтиргани ҳамда Ўзбекистон Ҳиротдаги Алишер Навоий мақбарасини таъмирлашда Афғонистон билан ҳамкорлик қилиши ҳақида хабар берилганди.
Изоҳ (0)