Давлат ва хўжалик бошқаруви органлари томонидан тадбиркорлар фаолиятига ноқонуний аралашув, турли бюрократик тўсиқлар яратиш каби салбий ҳолатлар натижасида 5 минг 833 та тадбиркорнинг ҳуқуқи бузилган. Бу ҳақда Бош прокуратура бошқарма прокурори Хуршид Шуҳратжонов АОКАдаги брифингда маълум қилди:
«Бизнесни юритиш ва тадбиркорлик фаолиятини амалга оширишда бир қатор ҳал этилмаган муаммолар сақланиб қолмоқда. Ушбу соҳада давлат идораларининг аралашуви ҳам салбий таъсир кўрсатмоқда. Қонун бузилиш ҳолатларини идоралар кесимида таҳлил қиладиган бўлсак, Давлат солиқ идоралари, маҳаллий ҳокимликлар, банк муассасалари, қурилиш, ДАВ кадастр, коммунал хизмат кўрсатиш идоралари мансабдор шахслари томонидан содир этилган», – деди Хуршид Шуҳратжонов.
Таъкидланишича, мазкур соҳада ўтказилган назорат тадбирларида 5 минг 833 та тадбиркорлик субъектининг ҳуқуқлари бузилгани аниқланган. Шулардан:
- банкдаги ҳисоб варақлари бўйича операцияларни асоссиз тўхтатиб туриш бўйича – 1 минг 281 та;
- ортиқча маблағ ундириш бўйича – 347 та;
- мурожаатларни кўриб чиқиш талабларига риоя қилмаслик бўйича – 466 та;
- давлат хизмати кўрсатиш тартибини бузиш бўйича – 465 та;
- лицензиялаш ва рухсат бериш тўғрисидаги қонун ҳужжатларини бузиш бўйича – 408 та;
- фаолиятни текшириш ва тафтиш қилиш тартибини бузиш бўйича – 181 та;
- имтиёзлар ва преференцияларни қўлламаслик бўйича – 838 та;
- хусусий мулк ҳуқуқини бузиш бўйича – 58 та;
- муҳандислик коммуникация тармоқларига уламаслик ва улардан асоссиз узиш бўйича – 43 та;
- ер ажратиш қоидаларига риоя қилмаслик бўйича – 248 та;
- банк хизмати кўрсатилишида қонун талабини бузиш каби ҳаракатлари бўйича – 64 та;
- бошқа қонун бузилиши ҳолатлари натижасида 1 минг 434 та тадбиркорларнинг ҳуқуқлари бузилган.
Изоҳ (0)