Бухоро вилоятининг Ромитан ҳамда Қоровулбозор тумани ҳокимларининг ўринбосарлари фаолиятида камчиликка йўл қўйгани сабаб лавозимидан олинган ва уларнинг ўрнига янги ўринбосарлар тайинланган. Бу ҳақда «Дарё»га вилоят ҳокимлиги ахборот хизмати раҳбари Олим Жўраев маълум қилди.
Таъкидланишича, Ромитан тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Бобур Наврўзов ишдан олингач, ўрнига Анваржон Очилов, Қоровулбозор ҳокимининг шу лавозим бўйича ўринбосари Юнус Тўраев ўрнига эса Давлат Жумаев ўринбосар этиб тайинланган.
Маълумот берилишича, Ромитан ҳокимига ўринбосар этиб тайинланган Анваржон Очилов 1983 йил Бухоро туманида туғилган бўлиб, Бухоро озиқ-овқат ва енгил саноат технологияси институтини тамомлаган. У фаолияти давомида Бухоро вилоят ҳокимининг иқтисодиёт ва тадбиркорлик масалалари бўйича биринчи ўринбосари котибияти мудири, Бухоро тумани ҳокимининг иқтисодиёт ва тадбиркорлик масалалари бўйича биринчи ўринбосари лавозимларида ишлаган. Тайинловга қадар эса вилоят иқтисодий тараққиёт ва камбағалликни қисқартириш бош бошқармаси бўлим бошлиғи сифатида фаолият кўрсатган.
Қоровулбозор тумани ҳокимининг янги ўринбосари Давлат Жумаев эса лавозимга қадар Ромитан туман давлат солиқ инспекцияси бошлиғи сифатида ишлаган. У ҳам 1974 йил Бухоро туманида туғилган бўлиб, Бухоро озиқ-овқат ва енгил саноат технологияси институтини тамомлаган. Давлат Жумаев 1997 йилдан 2020 йилга қадар Бухоро тумани давлат солиқ инспекциясида турли лавозимларида, шунингдек, вилоят давлат солиқ бошқармаси бошлиғининг биринчи ўринбосари лавозимида фаолият юритган.
Изоҳ (0)