«Дарё» фотомухбири Мадина Нурман 24 январь куни Telegram’даги шахсий каналида бош вазири ўринбосари Шуҳрат Ғаниев ва қишлоқ хўжалиги вазири Жамшид Хўжаевнинг эскалатордан пастга тушаётгани ва юқорига чиқаётгани акс этган икки суратни эълон қилди. Сурат президент Шавкат Мирзиёевнинг Бухоро вилоятига ташрифи доирасидаги тадбирлар вақтида олинган.
Мадина Нурманнинг маълум қилишича, суратлар эълон қилинганидан маълум вақт ўтиб, Қишлоқ хўжалиги вазирлигининг манфаатлари учун хизмат қилувчи ташкилот вакиллари фотомухбирдан суратларни ўчириб ташлашни «илтимос қилиб» сўраган, «босим бўлаётгани»ни айтган.
Мадина Нурман иккала фотосуратни ҳам ўчириб ташлаб, каналида шундай билдириш қолдирган: «Расмлар ўчди, афсуски. Шуҳрат Ғаниевнинг ёнидаги вазир канал муаллифи томонидан бошқа расмга олинмайди. Интернетдан оламиз хабарларимизга керак бўлиб қолсалар. Минг бор узр!».
Кўп ўтмай «Дарё» фотомухбирини блогерлар, хусусан, Хушнуд Худойбердиев, Шаҳноза Соатова, Лазизбек Ҳамидов ва бошқалар қўллаб-қувватлади ҳамда Мадина Нурман ўчириб ташлашга мажбур бўлган суратларни такроран эълон қилди. «Дарё» фотомухбири барчага ўз ташаккурини билдириб, вазиятга, жумладан, шундай муносабат билдирди:
«Илтимос, матбуот котиблари, ўз устингизда ишланг, ОАВ вакилига ҳар битта етказиб бораётган гапингиз қандай эффект беришини ўйланг, раҳбарларингизга тушунтиринг, хорижий нашрлар, халқаро сайтларни кўпроқ кузатинг, ўқинг, замон қандай эканини, медиа оламига қандай талаблар қўяётганини билинг, орқада қолиб кетманг. Ўчиртириш осон, лекин айтилган гап — отилган ўқ. Уни қайтариб бўлмайди, афсуски. Буёғи Стрейзанд эффектига айланиб кетишини ўйланг».Шу куннинг ўзида қишлоқ хўжалиги вазири Жамшид Хўжаев Facebook’даги саҳифасида вазият бўйича ўз муносабатини эълон қилди. Уни тўлиғича қуйида келтирамиз:
Хайплар қандай пайдо бўлишига энди шахсан гувоҳ бўлдим. Менинг ўрнимга ўйлаб, фаразу ихтиролар қилишни, бир томонлама хулосалар чиқаришни давом эттирмасликлари, буларнинг барчасини худди мансабдорлар ва ОАВнинг тўқнашуви сифатида талқин этмасликлари учун ўз фикрларимни билдиришга қарор қилдим.Бундан бир неча соат илгари, кундузи, дўстларим ушбу икки фотосурат битилган репостларни юбора бошлади. Фотосуратлар мени умуман ажаблантирмади, чунки фотограф бизни суратга олаётганини кўрганман ва улар яқин орада интернетга жойлаштирилишини ўшандаёқ тушунган эдим. Фотосуратчи қизни турли расмий тадбирларда бир неча бор кўрганман.
Ажабланарли ҳолат кейинроқ бўлди. Ушбу фотосуратлар муаллиф томонидан гўёки менинг аралашувим билан олиб ташлангани ҳақидаги янги хабарлар кела бошлади.
Кейинроқ билсам, фотосуратлар, айнан эса уларнинг остига ёзилган изоҳларни вазирлик матбуот котиби Нигора этикага тўғри келмайди, деган хулосага келган. Ҳамкасблари орқали фотосуратлар муаллифи билан боғланиб, тушунтирмоқчи бўлган. Фотолар муаллифи ва уларни олиб ташлашни илтимос қилганлар ўртасидаги мулоқот қандай ўтганидан бехабарман, аммо ўзи журналист бўлган Нигоранинг айтишича, муаллиф билан ҳамкасб сифатида мулоқот қилмоқчи бўлган.
Агар босим ёки тазйиқ ўтказилган бўлса, илтимос, менга хабар беринг, буни билишни истардим (Facebook’да дўстмиз, бемалол ёзинг). Аммо ундай эмаслигига шубҳам йўқ. Чунки иш мобайнида Нигорани жуда яхши билиб олганман — у хушмуомала ва андишали инсон.
Агар буларнинг барчаси хайп учун, «очко» олиш учун қилинмаётган бўлса, ҳар қандай ишда мулоқот учун ўрин борлиги ҳақида унутмайлик. Матбуот котибларининг журналист ва блогерлар билан мулоқотлари хайпга айланмаслиги лозим, бу ишга оид жараёнлар ахир. Агар бирор мутахассис бошқасига ўз фикрини етказмоқчи бўлса, бойкот эълон қилмасдан, буларнинг барчасини янги ахборот баҳоналарига айлантирмасдан уни тинглаш ва ҳақиқатан ҳам эшитиш мумкин албатта.
Фотосуратлар ва, умуман, журналистикада шундай ноодатий форматлардан фойдаланилишига келадиган бўлсак, тан олиш керак, бу анча қизиқарли ва ностандарт ёндашув. Шу боисдан мазкур икки фотони шу ерда, лентамда қолдираман.
Мадина, фотосуратларингиз яхши чиқибди, менга умуман расмларингиз ёқади. Фақатгина ўй-фикрларимни нотўғри ўқибсиз. Кейинги сафар, марҳамат, бемалол яқинроқ келинг ва саволингизни беринг — мен ҳамиша суҳбат учун очиқман. Барчамизнинг ишларимизга омад!
Жамшид Хўжаев, қишлоқ хўжалиги вазири
«Дарё» таҳририяти юз берган бу ҳолат нафақат суратларни, балки у ёки бу материалларни ҳам ўчириш ёки ўчиришга тенг даражада таҳрирлашни сўрайдиган шахсларга сабоқ бўлади ва уларни бундай ўринсиз илтимослар олдидан жиддий ўйлаб кўришга ундайди, деб ишонади.
Изоҳ (0)