BB, CC, DD кремларнинг ўзига хос хусусияти ва фарқлари

Бундан 10 йиллар аввал пайдо бўлган BB кремлар косметика оламида бир зумда машҳурликка эришган. Шундан кейин CC, DD ва АА кремлари ҳам пайдо бўлган. Алоҳида хусусиятга эга бўлган ва тонал кремга альтернатив сифатида ишлатиш мумкин бўлган ушбу кремларнинг ўзига хос томонлари ва бир-биридан фарқи ҳақида маълумот бериб ўтамиз.

BB кремлар

Илк бор Кореяда пайдо бўлган бюти бальзамдан (BB- beauty balm’нинг қисқартмаси) намлантирувчи крем, зардоб, праймер ва тонал кремга альтернатив сифатида ишлатиш тавсия қилинган. Ишлаб чиқарувчи компаниялар сотувни йўлга қўйиш ва тарғибот учун унга 5 таси бирда ҳатто 10 таси бирда деб ҳам ном бера бошлаган. Аслида эса ушбу крем намлантирувчи ва зардоб ўрнини боса олмайди. Аммо тери рангини силлиқ кўрсатиш, ортиқча қатлам ҳосил қилмасдан, юзни чиройли кўрсатиш хусусиятига эга. Тонал кремдан фарқли равишда, табиий макияж қилиш ва тиниқ кўрсатиши билан териси ёғли бўлган аёл ва қизлар, шу билан бирга, қуритиб юбормагани учун ҳам териси қуруқ бўлган нозик жинс вакиллари учун ҳам маъқул келган. Қуёш нуридан ҳимоя қилиши кремга хос афзалликлардан яна бири ҳисобланади.

CC кремлар

BB кремлар тонал кремларнинг яхшиланган варианти, CC кремлар эса юзга корректордек таъсир қилиб, рангини яхшилайди, улар ўртасидаги фарқ мана шунда. Color correction’нинг қисқартмаси бўлган ушбу крем тери рангини ўзгартиради, қизариш, доғ, ҳуснбузарларнинг кўзга ташланишини камайтиради. Ундан фойдаланувчилар BB кремдан ҳам енгилроқ ва шаффофроқ эканини таъкидлайди. CC кремлар корректорлар ўрнини босмайди, шунчаки ўз вазифаси, намлантириш, юзни енгил қоплаш ва рангини бир маромга келтиришни бажаради.

DD кремлар

Номи daily defence’нинг қисқартмасидан олинган DD кремлар кундалик ҳимоя учун айни муддао ҳисобланади. Унинг асосий вазифаси — тери юзасидаги липид қатламнинг сифатли фаолиятини таъминлаб, эпидермисни атроф-муҳитдаги зарарлардан ҳимоя қилиш. Ишлаб чиқарувчилар эрта қаришнинг олдини олиш учун қўллашни тавсия қиладиган ушбу кремдан аслида ёш ўтишига хос белгиларни тўғрилаш учун эмас, уларнинг олдини олиш учун фойдаланиш тавсия қилинади. DD крем ҳам терини яхши кўрсатади фақат бу борада CC кремларчалик таъсирга эга эмас.

АА кремлар

Номи anti-age қисқартмасидан олинган крем тери эрта қаришининг олдини олиш учун фойдаланилади.