Кишининг вазни ортишига рационнинг балансда бўлмаслиги, кам ҳаракатлик сабаб бўлади. Шунингдек, саломатликдаги муаммолар ҳам тўсатдан семиришга олиб келиши мумкин.
Кушинг синдроми
Туғма ёки орттирилган бўлиши мумкин бўлган ушбу синдром, буйрак усти безларининг ҳаддан ортиқ фаол равишда стресс гормони — кортизол ишлаб чиқарганида юз беради. Аксари ҳолларда 20-40 ёш атрофидаги аёллар ушбу синдромдан азият чекади. Турли сабаблар боис ривожланиши мумкин бўлган ушбу синдром асосан турли касалликлар, масалан, астма, ревмотоид артрит ва бошқа аутоиммун касалликларни даволаш учун фойдаланадиган глюкокортикоид препаратларни катта миқдорда истеъмол қилганда келиб чиқиши мумкин. Шунингдек, ушбу синдром гипофизнинг зарарсиз ўсимталарининг симптоми бўлиши мумкин. Организмда кортизолнинг кўплиги метаболизмни секинлаштиради ва бу вазн ортишига сабаб бўлади. Белнинг орқа қисмида, елка ва юзда ёғ тўпланиши, тананинг пастки қисмининг озиши эса ушбу синдромга хос саналади. Терининг қизариши, ҳуснбузар тошиши, қон босими кўтарилиши, мушаклар кучсизланиб, депрессияга тушиш ҳолатлари кузатилиши ҳам ушбу синдромнинг аломатлари ҳисобланади. Ташхис лабаратория таҳлили асосида қўйилади.
Ревматоид артрит
Бириктирувчи тўқималарнинг яллиғланиши, бўғимлар оғриши билан намоён бўладиган ушбу касалликда бўғин соҳасида қизариш ва шиш кузатилади, ҳаракатланиш қийинлашади. Ревматоид артритдан азият чеккан кишилар оғриқ ва дискомфортни камайтириш учун стероид препаратларни қабул қилишига тўғри келади. Бундай препаратларнинг ножўя таъсири организмда суюқликни ушлаб туради ва бу шишни келтириб чиқаради. Бунинг ҳисобига тана вазни ортади, қомат ҳам бесўнақай кўрина бошлайди.
Гипотериоз
Тўлаликнинг яна бир кенг тарқалган симптомларидан бири гипотериоз ҳисобланади. Бунда метаболизм меъёрда бўлиши учун муҳим рол ўйнайдиган гормонлар меъёрда бўлмайди. Моддалар алмашинувининг ёмонлашиши вазн ортишишига олиб келади. Унга қон таҳлили ва қалқонсимон без гормонларини текшириш орқали ташхис қўйиш мумкин. Агар семиришга гипотериоз сабаб бўладиган бўлса, рационга ўзгартириш киритиш ва жисмоний фаолликнинг ўзи камлик қилади. Организмдаги гормонларни меъёрга келтирибгина кўзланган мақсадга эришиш мумкин. Бунинг учун эса эндокринолог шифокорга мурожаат қилиш керак бўлади.
Юрак етишмовчилиги
Мушаклари сустлашганининг ҳисобига юрак қон ҳайдаб беришга қийналади. Бунинг оқибатида аъзолар етарлича қон, яъни кислород ва озуқа моддалари билан таъминлана олмайди. Оёқ қўлларнинг учида, ўпкада суюқлик тўпланади. Танада шиш кузатилади, вазн ортади. Нафас қисиши, тез ҳолдан тойиш, жисмоний фаоллик камайиши ҳам юрак етишмовчилигига хос белгилар ҳисобланади. Саломатлик билан боғлиқ жиддий оқибатларнинг олдини олиш учун эса шифокорга мурожаат қилиш керак.
Testoстерон миқдорининг камайиши
Организмдаги гормонал тизимнинг ишдан чиқишидан нафақат аёллар, балки эркаклар ҳам азият чекади. Testoстерон миқдори камайганида қорин соҳасида ёғ йиғилади. Мушаклар вазнининг камайиши, тез ҳолдан тойиш, диққат билан боғлиқ муаммолар келиб чиқиши ҳам тестостерон гормони етишмаслигига хос белгилардан. Шифокор кўрсатмасига биноан, биологик фаол қўшимчаларни қабул қилиш эса вазиятга ечим топишга ёрдам бериши мумкин.
Изоҳ (0)