Косон тумани ҳокими Асрол Бойқараев ёки унинг ўғли бошқаргани айтилган Captiva 60 ёшли фуқарони уриб юборган. «Kun.uz» нашрининг мурожаатчига таяниб ёзишича, ЙТҲ оқибатида 60 ёшли фуқаро воқеа жойида вафот этган.
Ҳокимнинг 027 КАА давлат рақам белгили Captiva’си иштирокидаги ЙТҲ 2020 йилнинг 12 декабрь куни содир бўлган. ЙТҲ расмийлаштирилган ҳужжатларда автомобилни ҳоким ўринбосарининг ҳайдовчиси Раҳим Жўраев бошқаргани ёзилган.
Нашрнинг ёзишича, воқеа юз берган жойда бўлган гувоҳлар ЙТҲ кечки соат 20:00 атрофида содир этилганини айтган. Автоҳалокат содир этилган 70 027 КАА давлат рақамли Captiva ичида туман ҳокими, хотини ва қизи бўлган. Шу воқеадан сўнг ҳокимнинг ҳайдовчиси алмаштирилган. Айб Раҳим Жўраевнинг зиммасига юкланмоқда, у эса айбсизлигини таъкидлаган.
Косон туман ИИБ ТБ терговчиси Ҳусниддин Валиевнинг нашрга қўшимча қилишича, ЙТҲ юзасидан тергов ҳаракатлари бошланган. Ҳодиса оқибатида инсон вафот этгани туфайли иш юритув вилоят ИИБ тергов бошқармасига ўтказилган.
«Дарё» мухбири билан суҳбатлашган Косон тумани ҳокимлиги ахборот хизмати раҳбари Дилшод Набиевнинг маълумот беришича, туман ҳокимига тегишли 027 КАА рақамли хизмат автомобилини анча вақтдан буён биринчи ўринбосар ҳайдовчиси Раҳим Жўраев бошқариб келган.
«Ҳокимнинг шу пайтга қадар автомобиль бошқарганини кўрмаганман. Ўша куни ҳам рулда ўзи бўлган, деган гапга қўшилмайман. Ҳоким ҳам мазкур хабарни рад этиб, ўша воқеа содир бўлганини ўзи ҳам кейинчалик эшитганини айтди», — дейди Дилшод Набиев.
«Kun.uz» сўровига жавобан воқеа ҳақида тез орада вилоят ИИБ расмий каналида хабар берилади, деган вилоят ИИБ ахборот хизмати ҳамон воқеа ҳақида гапирмади.
Изоҳ (0)