Ижтимоий тармоқларда қурилиши тугалланмаган спорт иншоотига иморатларнинг том қисмини ёпиш учун мўлжалланган плитанинг қулаб тушганлиги ва ушбу қурилиш маҳсулоти Навоий вилоятида ишлаб чиқарилганлиги номаълум муаллиф томонидан иддао қилинган видеолавҳа тарқалди.
«Ўзсаноатқурилишматериаллари» уюшмаси ахборот хизмати хабарига кўра, мазкур ҳолатга аниқлик киритиш мақсадида уюшмаси Навоий вилояти ҳокимлиги билан ўрганишлар олиб борди.
Маълум бўлишича, бугунги кунда Навоий вилоятида бетон плиталар ишлаб чиқарувчи тадбиркорлик субъектлари томонидан қурилиш объектларига етказилиб берилаётган ушбу турдаги маҳсулот белгилари видеолавҳада акс этган маҳсулотга мутлақо тўғри келмайди.
Таъкидланишича, бугунги кунда Навоий вилояти ҳудудларида видеолавҳада баён этилган бино қурилиши мавжуд эмас ва саноат корхоналари томонидан бу кўринишдаги бетон маҳсулоти етказиб берилмаган.
Эслатиб ўтамиз, 10 январь куни Жиззах шаҳрида янги қурилаётган кўп қаватли уйнинг бир қисми қулаб тушган эди. ФВВ ва Бош прокуратуранинг қайд этишича, воқеа оқибатида тан жароҳати олган ва ҳалок бўлган фуқаролар бўлмаган. Маълум қилинишича, қулаб тушган бино ёнидаги 6 қаватли иншоотнинг ҳам пойдеворларида чўкиш аломатлари кузатилган бўлиб, ҳозирда у хавфли ҳолатда турибди.
Ҳалокатни ўрганиш мақсадида бош вазирнинг биринчи ўринбосари Очилбой Раматов бошлиқ ҳукумат комиссияси тузилган. Шунингдек, мазкур ҳолат юзасидан ўтказилган терговга қадар текширув натижасига кўра, Жиззах вилояти қурилиш соҳасида ҳудудий назорат инспекцияси мансабдор шахсларига нисбатан Жиноят кодексининг 207-моддаси (мансабга совуққонлик билан қараш) билан жиноят иши қўзғатилган.
Изоҳ (0)