Комил Алламжонов ва Саида Мирзиёева эфирдан олинган «Заковат» лойиҳасини ўз оталиғига олди

Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов декабрь ойидан буён эфирдан олинган «Заковат» теледастури давом этишини маълум қилди.

«‘Заковат’ ёпилмайди. Аксинча, гуллайди. Биз Саида Мирзиёева билан ушбу лойиҳани ўз оталиғимизга олдик. Бу йил, иншааллоҳ, ушбу медиалойиҳа орқали республикамиздаги янгидан янги билимдон ёшларни кашф қиламиз», — деб ёзган у Telegram’даги саҳифасида.

«Заковат» интеллектуал телеўйини ўзининг 20 йиллик тарихида учта телеканалда фаолият юритган. Дастлаб «Ёшлар»да очилган теледастур кейинчалик «Ўзбекистон» телеканалига, охири нодавлат каналлар орасида рейтинги юқорилаб бораётган «Миллий»га ўтган.

Теледастур эфирга узатилиши тўхтагани ва суратга олинган 2 та кўрсатув намойиш этилмагани ҳақида блогер Хушнудбек Худойбердиев маълум қилган. У «Заковат» кўрсатувининг тўхтатилишига у эфирга кетадиган хусусий канал кўрсатувни рейтинг ололмаяпти деган важ сабаб бўлганини билдирган.

«Kun.uz»нинг ёзишича, дастур муаллифи Абдурасул Абдуллаев бу гаплар қисман тўғри, лекин шу билан бирга, бунинг объектив сабаблари ҳам борлигини айтиб ўтган.

«Ўзи МТРКдан ‘Миллий’ телеканалига ўтишимиз бўйича музокаралар 3 ойча давом этган, бизга жуда катта ваъдалар берилганди. Мен нодавлат телеканалида ижод эркинлиги кенгроқлиги, яхшироқ таклифлар билдиришгани учун қабул қилгандим. Аммо бизни таклиф қилганлар, келишганларнинг деярли барчаси ишдан бўшаб кетишди. Бизга ажратилган техник имкониятлар қисқартирила бошланди, ‘Заковат’нинг эфирга узатилиш вақти жуда кечиктириб юборилди, ҳатто соат 23:00 га қўйилган вақтлар ҳам бўлди. Намойиш ойига икки мартага туширилди ва қайта эфирлар бутунлай тўхтатилди. Бу энди телеканалга боғлиқ жиҳатлари», — деган дастур муаллифи.

Унинг сўзларига кўра, «Миллий» телеканали муассиси Комил Алламжонов «Заковат» эфирдан олинганлигидан бехабар бўлган, бу ҳақда ижтимоий тармоқлар орқали хабар топган. Миллий масс-медиани қўллаб-қувватлаш ва ривожлантириш жамоат фонди ҳомийлиги остида «Заковат»ни қайта тиклаш, янада бойитиш, соврин учун ҳатто автомобиль қўйиш таклифини айтган. «Биз бундан хурсанд бўлдик», — деган Абдурасул Абдуллаев.