Koson tumani hokimi Asrol Boyqarayev yoki uning o‘g‘li boshqargani aytilgan Captiva 60 yoshli fuqaroni urib yuborgan. “Kun.uz” nashrining murojaatchiga tayanib yozishicha, YTH oqibatida 60 yoshli fuqaro voqea joyida vafot etgan.
Hokimning 027 KAA davlat raqam belgili Captiva’si ishtirokidagi YTH 2020-yilning 12-dekabr kuni sodir bo‘lgan. YTH rasmiylashtirilgan hujjatlarda avtomobilni hokim o‘rinbosarining haydovchisi Rahim Jo‘rayev boshqargani yozilgan.
Nashrning yozishicha, voqea yuz bergan joyda bo‘lgan guvohlar YTH kechki soat 20:00 atrofida sodir etilganini aytgan. Avtohalokat sodir etilgan 70 027 KAA davlat raqamli Captiva ichida tuman hokimi, xotini va qizi bo‘lgan. Shu voqeadan so‘ng hokimning haydovchisi almashtirilgan. Ayb Rahim Jo‘rayevning zimmasiga yuklanmoqda, u esa aybsizligini ta’kidlagan.
Koson tuman IIB TB tergovchisi Husniddin Valiyevning nashrga qo‘shimcha qilishicha, YTH yuzasidan tergov harakatlari boshlangan. Hodisa oqibatida inson vafot etgani tufayli ish yurituv viloyat IIB tergov boshqarmasiga o‘tkazilgan.
“Daryo” muxbiri bilan suhbatlashgan Koson tumani hokimligi axborot xizmati rahbari Dilshod Nabiyevning ma’lumot berishicha, tuman hokimiga tegishli 027 KAA raqamli xizmat avtomobilini ancha vaqtdan buyon birinchi o‘rinbosar haydovchisi Rahim Jo‘rayev boshqarib kelgan.
“Hokimning shu paytga qadar avtomobil boshqarganini ko‘rmaganman. O‘sha kuni ham rulda o‘zi bo‘lgan, degan gapga qo‘shilmayman. Hokim ham mazkur xabarni rad etib, o‘sha voqea sodir bo‘lganini o‘zi ham keyinchalik eshitganini aytdi”, — deydi Dilshod Nabiyev.
“Kun.uz” so‘roviga javoban voqea haqida tez orada viloyat IIB rasmiy kanalida xabar beriladi, degan viloyat IIB axborot xizmati hamon voqea haqida gapirmadi.
Izoh (0)