Давлат статистика қўмитаси 2020 йил якуни бўйича Ўзбекистоннинг демографик кўрсаткичларига оид маълумотлари ва ўлим статистикасини эълон қилади.
Кўпчилик журналист ва блогерлар томонидан қизиқиш билдирилаётган ўлим статистикаси ҳамда республиканинг демографик кўрсаткичларига оид маълумотлар Давлат статистика қўмитаси томонидан айни кунларда тайёрланмоқда ва эълон қилиниши режалаштирилган.Ўзбекистонда 2020 йил августидан бери умумий ўлим ҳолатлари бўйича расмий статистик маълумотлар эълон қилинмаяпти. Давлат статистика қўмитаси октябрь ойида тўққиз ойлик якунлари бўйича демографик ҳолатга доир ахборотномасида умумий ўлим статистикасини ҳам эълон қилиши лозим эди, бироқ ушбу маълумотлар ҳозирга қадар эълон қилинмаган. 2020 йил учун фақат январь—июль ойларига тааллуқли ўлим статистикаси маълум, холос.2021 йил январь ойининг якунига қадар 2020 йил якуни бўйича республиканинг демографик кўрсаткичларига оид статистик маълумотлар ва ўлим статистикаси кўрсаткичлари қўмитанинг расмий веб-сайти ҳамда ижтимоий тармоқлардаги расмий саҳифаларида эълон қилинади.
Давлат статистика қўмитаси ахборот хизмати
Қўмита ушбу ҳолат юзасидан ноябрь ойида берган изоҳида ўлим статистикасини шакллантириш учун масъул ҳисобланган Адлия вазирлиги ва Соғлиқни сақлаш вазирлиги тегишли маълумотларни Статистика қўмитасига тақдим этмаганини маълум қилган эди. Ўшанда Адлия вазирлиги қўмитанинг бу баёнотини рад этиб, маълумотлар тақдим этилганини билдирган бўлса, Соғлиқни сақлаш вазирлиги ОАВнинг бу борадаги сўровларига жавоб бермаган.
Иқтисодчи Беҳзод Ҳошимовнинг таъкидлашича, умумий ўлим ҳолатлари бўйича статистик маълумотлар ҳозир эълон қилинмагани билан, келгусида эълон қилинишига умид бор ва бу айнан ҳозир сохта, «чизилган» статистик маълумотлар тақдим этилишидан яхшироқ. Чунки ўтган даврда айрим статистик маълумотлар «чизилган», «ўйлаб топилган» рақамлардан иборат бўлгани учун энди ўша вақтдаги ҳақиқий аҳвол аслида қандай бўлганини ҳеч қачон билиб бўлмайди.
Маълумот учун, 2020 йил июлида Ўзбекистонда умумий ўлим кўрсаткичи шу ой учун сўнгги йилларда шаклланган ўртача кўрсаткичдан 26,4 фоизга, Тошкент шаҳрида 166 фоизга, Тошкент вилоятида 43,8 фоизга, Навоий вилоятида 51,7 фоизга юқори бўлган.
Изоҳ (0)