Олий Мажлис Қонунчилик палатасининг 14 январь куни бўлиб ўтган мажлисида депутатлар томонидан икки вазирлик раҳбарлигига номзод кўриб чиқилди ва маъқулланди, дея хабар бермоқда палата матбуот хизмати.
Хабар беришларича, олий ва ўрта махсус таълим вазири лавозимига шу вақтгача Термиз давлат университетига ректорлик қилиб келган сенатор Абдуқодир Тошқулов номзоди маъқулланган. Уй-жой коммунал хизмат кўрсатиш вазири лавозимига эса шу вақтгача қурилиш вазири биринчи ўринбосари лавозимида ишлаб келган Шерзод Ҳидоятов маъқулланган.
Амалдаги қонунчиликка мувофиқ, Вазирлар Маҳкамаси аъзолари, вазирлар лавозимга тайинланишидан аввал уларнинг номзоди Олий Мажлис Қонунчилик палатасида депутатлар томонидан кўриб чиқилади. Уларнинг лавозимга тайинлови Президент фармони эълон қилинганидан сўнг тўла тасдиқланади.
Куни кеча олий ва ўрта махсус таълим вазири Иномжон Мажидов истеъфога чиқарилгани, у Ўзбекистон Миллий университетига ректор этиб тайинланиши кутилаётгани ҳақида хабарлар тарқалган, бироқ кейинроқ вазирлик матбуот хизмати бу хабарларни рад этган эди.
Уй-жой коммунал хизмат кўрсатиш вазирлигининг аввалги раҳбари Музаффар Солиев «ишда йўл қўйган камчиликлари, қайта-қайта огоҳлантиришларга қарамай тегишли хулоса чиқармагани учун» 5 январь куни лавозимидан озод этилган эди.
Изоҳ (0)