Инвесторлар автомобиль ишлаб чиқариш бўйича 8 та лойиҳани таклиф этмоқда — Шавкат Мирзиёев

Қатор компаниялар Ўзбекистон машинасозлик соҳасига ва мамлакатда автомобиль ишлаб чиқариш йўлида инвестиция киритишга қизиқиш билдирмоқда. Бу ҳақда Президент Шавкат Мирзиёев 13 январь куни машинасозлик тармоғини трансформация қилиш ва соҳада рақобатни ривожлантириш масалалари бўйича ўтказган йиғилишда маълум қилди.

«Хусусий инвесторлар томонидан бевосита Жиззах, Навоий, Наманган, Андижон ва Тошкент вилоятларида автомобиль ишлаб чиқариш бўйича жами 276 миллион долларлик саккизта лойиҳани амалга ошириш таклифи берилмоқда», — дейди давлат раҳбари «Ўзбекистон 24» телеканали сюжетида.

Инвестициялар ва ташқи савдо вазири ўринбосари Лазиз Қудратовнинг маълум қилишича, Президент 10 кун ичида саноат йиғиши тўғрисидаги низомни ишлаб чиқиш ва тасдиқлатиш вазифасини қўйган.

«Бугунги кунда республика ҳудудида ишлаб чиқаришни яратишга қизиқиш билдираётган саккизта хориж компаниясидан таклиф бор. Уларнинг фаолиятини рағбатлантириш, тенг шароитларни яратиш мақсадида 10 кун ичида Ўзбекистон ҳудудида автомашиналарни саноат йиғиш тўғрисидаги низом тайёрланади ва тасдиқланади. У автомобиллар ишлаб чиқариладиган шароит истеъмолчилар талабларига жавоб беришга хизмат қилади», — дейди у.

Қудратовнинг сўзларига кўра, нархлар пасайишига, автомобиль моделлари қаторининг кенгайишига, рақобат муҳитини яратилишига олиб келади ва «бунинг натижасида истеъмолчиларимиз фойда қилади».

«Ўзавтосаноат» раиси Шавкат Умурзоқовнинг қўшимча қилишича, саноат йиғиши борасидаги низом «бозорнинг барча иштирокчилари учун ягона стандартни белгилаб беради».

Аввалроқ Ўзбекистоннинг 2021—2023 йилга мўлжалланган инвестиция дастурида автомобиль ишлаб чиқариш соҳасига оид бир нечта лойиҳалар кўрсатиб ўтилган эди. Улар орасидан пикаплар, минивенлар, юк ва енгил автомобилларни ишлаб чиқариш борасидаги лойиҳалар ўрин олган.

Эслатиб ўтамиз, Президент Шавкат Мирзиёев 29 декабрь куни Олий Мажлисга йўллаган мурожаатномасида автомобиль ишлаб чиқарувчилар сонининг ортишини маълум қилганди. Давлат раҳбарининг сўзларига кўра, бу автомобиль саноатида соғлом рақобатни ривожлантириш ва корхоналарга тенг шароитларни яратиш ҳисобига амалга оширилади.