«Толлимаржон» ИЭСда 8 январь куни юз берган авария оқибатида Қашқадарё вилоятининг етти тумани ва бир шаҳри электр таъминотидан тўлиқ узилиб қолди. Бу ҳақда Қашқадарё ҳудудий электр тармоқлари корхонаси хабар бермоқда.
Таъкидланишича, ИЭСдаги ҳар бирининг қуввати 450 мегаватт бўлган иккита энергоблок ишлашдан тўхтаган. Энергетика вазирлигининг аниқлик киритишича, 8 январь куни соат 10:27 да ва 10:31 да «Толлимаржон» ИЭСнинг 2 ва 3-буғ-газ қурилмалари «энергоблок технологик ҳимоясининг ишлаши натижасида» тўхтаган.
«Оқибатда Ўзбекистоннинг айрим ҳудудлари бўйлаб электр энергияси таъминотида умумий 446 мегаватт қувватда чеклов киритилмоқда. Вазир Алишер Султонов бошчилигидаги мутахассислар зудлик билан мазкур станцияга учиб кетди. Ҳозирги вақтда юзага келган тўхтатилиш сабаблари аниқланмоқда», — дейилади вазирлик ахборотида.
Қашқадарё электр тармоқлари корхонасининг қўшимча қилишича, авария оқибатида вилоятнинг Қамаши, Яккабоғ, Шаҳрисабз, Китоб, Чироқчи, Ғузор, Нишон туманлари ва Шаҳрисабз шаҳрида электр таъминоти тўлиқ узилган.
«Gazeta.uz»нинг ёзишича, «Толлимаржон» ИЭСда 2016 ва 2017 йилларда иккита буғ-газ қурилмаси ишга туширилган. Қурилиш Жанубий Кореянинг Daewoo ва Hyundai компаниялари томонидан амалга оширилган. Станциянинг 2004 йилда ишга тушган 800 мегаватт қувватга эга биринчи энергоблоки эса ишлашда давом этмоқда (станция қурилиши СССР даврида бошланган).
5 январь куни ҳам «Толимаржон» ИЭСнинг иккита буғ-газ қурилмаси ишламай қолиши оқибатида Қашқадарёнинг айрим ҳудудлари қисман, Қамаши, Яккабоғ, Шаҳрисабз, Китоб туманлари эса тўлиқ электр таъминотидан узилган, бир неча туманда сув таъминоти ҳам тўхтаб қолган эди.
Шунингдек, Ўзбекистоннинг бошқа иссиқлик электр станцияларида ҳам қисман ўчиш ҳолатлари юз бергани маълум қилинган эди. 7 январь куни эса Энергетика вазирлиги Ўзбекистон ИЭСлари ва мамлакат энергетика тизимининг ишлаш тартиби тўлиқ тикланганини маълум қилганди.
Мавзуга доир:
