Фото: Қайтадан локдаун жорий этилгач, ҳувиллаб қолган Лондон манзаралари

Янги чоралар жорий этилиши ҳақида Буюк Британия бош вазири Борис Жонсон 4 январь куни халққа қилган мурожаатида эълон қилди, деб ёзади «РБК».

«Вируснинг янги варианти қўрқитадиган даражада тез тарқалмоқда. Учинчи миллий локдаун зарурлиги аниқ-равшан», — деди Жонсон.

Жонсоннинг сўзларига кўра, коронавируснинг янги штамми тарқалишни бошламаганида, янги чораларга зарурат қолмаган бўларди. «Бизнинг COVID-19’га қарши курашдаги жамоавий ҳаракатларимиз иш берган ва агар вируснинг янги тури чиқмаганида эди, иш беришда давом этган бўларди», — деди Жонсон.

Чекловлар доирасида Буюк Британиядаги барча бошланғич ва ўрта мактаблар масофадан ўқишга ўтади. Бундан ташқари, 6 январдан бутун мамлакат бўйлаб мажбурий яккаланиш жорий этилади — фуқаролар фақат ишга бориш, озиқ-овқат ва энг зарур нарсаларни сотиб олиш, тиббий ёрдам олиш ёки спорт билан шуғулланиш учунгина уйдан чиқиши мумкин бўлади.

Икки ой ичида Буюк Британияда коронавирус инфекциясига чалиниш даражаси икки карра ўсиб, ҳар 100 минг аҳолига 519 та ҳолатга етди.

4 январь ҳолатига мамлакатда бир кеча-кундузда 58 784 та янги ҳолат аниқланди. 407 киши вафот этди. Бутун пандемия даврида эса мамлакатда 2,7 миллион киши коронавирусни юқтириб олди, 75,5 минг киши вафот этди.