Самарқанддаги мактабда қозонхона «котёли» портлаши оқибатида бир киши вафот этгани хабар берилганди. Самарқанд шаҳар халқ таълими бўлими масъулларининг «Дарё»га маълум қилишича, 4-мактабнинг табиий газ билан ишловчи иситиш қозонлари электр таъминотида узилиш бўлганда автоматлаштирилган тарзда ўчган ва мазкур мудҳиш воқеани келтириб чиқарган.
Таъкидланишича, мактабдаги электр энергиясининг вақтинчалик узилиши газ тармоғида босимнинг ортишига олиб келган. Натижада иситиш қозонининг автоматик ўчиш-ёқиш ускунаси ишдан чиққан. Ва сизиб чиққан табиий газ қозонхона ичига тўпланган. Мактаб ўт ёқувчиси Б.Ҳ. иситиш қозонини ёқмоқчи бўлганида портлаш содир бўлган. Оқибатда ходим оғир тан жароҳати олиб, Республика шошилинч тез тиббий ёрдам илмий маркази Самарқанд вилояти бўлимига ётқизилган.
Шаҳар ХТБ масъулларининг айтишича, ўша куни тунги соат 24:00 да вилоят халқ таълими бошқармаси бошлиғи Зебинисо Шодиева ҳамда шаҳар халқ таълими бўлими мудири вазифасини бажарувчи Анвар Нурмуратов ҳодиса жойига етиб келган. Сўнгра шифохонага бориб, Б.Ҳ.нинг ҳолидан хабар олган. Бироқ кўрсатилган тиббий ёрдамга қарамасдан, ўт ёқувчи вафот этган.
Айтилишича, 2020/2021-ўқув йили аввалида, куз—қиш мавсумига тайёргарлик жараёнларида барча мактаб педагог ва техник ходимлари техника хавфсизлиги қоидалари билан таништирилган. Мазкур қоидаларга амал қилиш бўйича кафолат хатлари олинган.
«Марҳум Б.Ҳ. 2020 йилнинг 2 ноябрь кунидан бошлаб мактабда мавсумий қозонхона ишчиси вазифасига тайинланган. Жорий йилнинг 2 январь куни навбатчиликни қабул қилиб олишдан аввал қозонхонадаги иситиш қозонлари соз ҳолатда эканлигини тасдиқлаб, дафтарга имзо қўйган. Вилоят халқ таълими бошқармаси раҳбарияти томонидан марҳум Б.Ҳ.нинг оила аъзолари ҳолидан хабар олиниб, уларга моддий ёрдам кўрсатилди», — дейилади ХТБ масъуллари берган маълумотда.
Самарқанд вилоят ИИБ ахборот хизматининг «Дарё»га қўшимча маълумот беришича, мактаб қозонхонасида содир бўлган чақнаш юзасидан Самарқанд шаҳри бўйича ИИО ФМБ ҳузуридаги тергов бўлими томонидан Жиноят кодексининг 257-моддаси (меҳнатни муҳофаза қилиш қоидаларини бузиш) 2-қисми «а» банди билан жиноят иши қўзғатилган. Ҳозирда тергов-суриштирув жараёнлари бўлиб ўтмоқда.
Изоҳ (0)