Бугун,

  • USD 11014.01
  • RUB 191.8
  • EUR 10674.78

Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги 22 декабрь куни Ucell мобил оператори томонидан абонентлар ҳисоб рақамидан ноқонуний ечиб олинган 97 миллион сўм эгаларига қайтарилгани ҳақида ахборот берган эди. Ucell компанияси агентликнинг бу баёнотида ноаниқликлар борлигини маълум қилди.

Агентлик ахборотида Ucell томонидан First IT-Group контент-провайдери базасида тақдим этилган «Ал-Чироқ» хизматида 2020 йил 30 сентябрдан 4 октябргача носозлик кузатилгани, бунинг оқибатида хизмат кўрсатилмаган бўлса-да, салкам 338 минг абонентнинг ҳисоб рақамларидан жами 97,43 миллион сўм ечиб олингани билдирилган.

Агентлик бу ҳолат «Истеъмолчиларнинг ҳуқуқларини ҳимоя қилиш тўғрисида»ги қонуннинг 21-моддасига зид («сотувчи... кўрсатилмаган хизматлар учун ҳақ олишга ҳақли эмас») эканини эслатган ҳолда, ноқонуний ечиб олинган пуллар муаммони агентлик томонидан ҳал қилиш жараёнида эгаларига тўлиқ қайтарилгани таъкидланади.

Ucell компаниясидан маълум қилишларича, ҳақиқатан ҳам 30 сентябрдан 4 октябргача «Ал-Чироқ» хизматида носозлик кузатилган. Носозлик 5 октябрда бартараф этилган, 6 октябрдан эса носозлик кунлари ечиб олинган пул ҳисоб-китоби бошланган. «97,43 миллион сўм маблағ 9 октябрнинг охирига қадар абонентларга қайтарилди», — дейилади Ucell баёнотида.

Мобил оператор баёнотида таъкидланишича, Истеъмолчилар ҳуқуқларини ҳимоя қилиш агентлиги салкам 338 минг абонентга 97,43 миллион сўм қайтарилиши ҳақида фақат 6 ноябрга келиб, агентликнинг 2 ноябрдаги сўровига Ucell ёзган жавобдан сўнг хабар топган, 19 ноябрь куни қўшимча равишда жараён ҳақида 6 377 саҳифадан иборат ҳужжат агентликка тақдим этилган.

Ucell’нинг алоҳида қайд этишича, агентликнинг 22 декабрда эълон қилинган баёнотидаги «агентлик томонидан муаммони ҳал қилиш жараёнида... маблағлар тўлиқ қайтарилди» сўзлари нотўғри, «чунки аслида Ucell агентликдан 2 ноябрь куни келиб тушган сўровга қадар маблағларни қайта ҳисоблаб чиққан ва пулларни абонентларга қайтариб бўлганди».

«Ucell ҳар бир абонент билан шаффоф, очиқ, самарали ва тийинига қадар аниқликда ишлайди», — дея қўшимча қилинган Ucell’нинг баёнотида.

Изоҳ
Асосий янгиликлар