ЮНЕСКО 2020 йилда ўз вазифасини бажариш давомида 59 нафар ОАВ ходими ўлдирилганини танқид қилди, деб хабар бермоқда «Gazeta.uz».
Ташкилотнинг 23 декабрдаги баёнотида айтилишича, 2020 йилда энг кўп ОАВ ходимлари Лотин Америкасида ва Кариб денгизи бўйи ҳудудларида ўлдирилган. Ушбу ҳудудга 59 та қотилликнинг 22 таси тўғри келган. Араб давлатларида эса ўз вазифасини бажараётган 9 нафар, Африкада 6 нафар журналист ўлдирилган.
Шундай бўлса-да, ЮНЕСКО маълумотларига кўра 2020 йил журналистлар учун охирги ўн йил ичида энг хавфли йил эмас. 2019 йилда 57 нафар ОАВ ходими ҳалок бўлган бўлса, 2018 йилда ундан ҳам кўп — 99 нафар ходим ҳалок бўлган.
«2020 йилда биз демократиямиз ва инсон ҳуқуқларини ҳимоя қилишда журналистиканинг аҳамияти, эҳтимол, мисли кўрилмаган тарзда муҳимлигининг гувоҳи бўлдик. Бироқ пандемия ҳам бутун дунё бўйлаб матбуот эркинлигига таъсир кўрсатган мукаммал бўрон бўлди», — деган ЮНЕСКО бош директори Одре Азуле.
Таъкидланишича, COVID-19 пандемияси даврида журналистларнинг хавфсизлиги билан боғлиқ муаммолар чуқурлашди. Пандемия туфайли юзага келган инқироз рекламалардан тушадиган даромаднинг камайишини олиб келиб, ОАВларнинг барқарорлиги ва ҳаётини хавф остига қўйди. Журналистлар маълумот излаш, олиш ва тарқатишда чекловларга дуч келди.
Бундан ташқари, экспертларнинг таъкидлашича, кўплаб мамлакатларда вирус тарқалишининг олдини олиш бўйича қабул қилинган фавқулодда қонунчилик чоралари сўз ва матбуот эркинлигини чеклаш учун асос бўлиб хизмат қилди. Журналистлар, шунингдек, расмийларнинг соғлиқни сақлаш инқирозига бардош бера олмаганлигини фош қилгани учун суд таъқибига учради.
«Янги йил арафасида мен халқаро ҳамжамиятни маълумотларнинг жамиятга манфаат келтирувчи сифатидаги аҳамиятини сақлаб қолишга чақираман. Журналистикани ҳимоя қилиш ҳақиқатни ҳимоя қилишдир», — деган ЮНЕСКО бош директори Одре Азуле.
Аввалроқ БМТ Инсон ҳуқуқлари бўйича Олий комиссари пандемия шароитида цензура ва журналистларга босим ошганини айтганди.
Изоҳ (0)