Бугун,

  • USD 10940.05
  • RUB 182.26
  • EUR 11121.65

Тошкент шаҳрининг Аҳмад Дониш кўчасидан кичик ҳалқа автомобиль йўли, Мискин ва Уста Ширин кўчалари кесишмасидаги автомобиллар учун мўлжалланган йўл ўтказгичда капитал таъмирлаш ишлари якунланиб тўлиқ ҳаракат йўлга қўйилди. Бу ҳақда «Ўзбекистон темир йўллари» АЖ хабар берди.

Фото: «Ўзбекистон темир йўллари» АЖ

Фото: «Ўзбекистон темир йўллари» АЖ

«Ушбу йўл ўтказгич 2000 йилда қурилган. Умумий узунлиги 912 метр, эни эса 29 метр, конструкция қисми 660 метр, ёндашиш йўлларининг узунлиги 252 метр бўлган кўприк ишга туширилгандан буён таъмирлаш ишлари амалга оширилмаган. Шу сабабли йўл ўтказгичнинг қатнов қисмидаги темир-бетон конструкциялар, ғилдирак қайтаргичлар, безак плиталари, металл тўсиқ панжаралари, асфальт-бетон қопламалари ҳамда тароқсимон кўринишидаги деформацион чоклари яроқсиз ҳолга келиб қолганди», — дейилади хабарда.

Фото: «Ўзбекистон темир йўллари» АЖ

Фото: «Ўзбекистон темир йўллари» АЖ

Йўл ўтказгични мукаммал таъмирлаш ишларини олиб боришда, асосан, қатнов қисмидаги темир-бетон конструкциялар алмаштирилган ва остки фазосидаги конструкция қисмлари балкалар, ригеллар ҳамда таянч устунлари, темир-бетон қопламаларининг бузилган жойлари қайта тикланган. Йўл ўтказгичнинг қатнов қисмидаги йўлни ажратиб турувчи қуйма бетонблоклар ўрнатилиб, асфальт-бетон қопламаси ётқизилган.

Мазкур йўл ўтказгични таъмирлаш ишлари 2019 йил куз ойларида бошланган ва унга 21 миллиард сўм маҳаллий бюджет ҳисобидан ажратиш белгиланган эди. 2019—2020 йиллардаги қиш мавсумида таъмир ишлари тўхтатилганди. Таъмирлаш ишлари тўхтатилиши сабаб ҳайдовчиларга ноқулайлик туғилиши оқибатида кенг жамоатчилик муҳокамасига сабаб бўлган.

Пойтахт ҳокимлиги 30 ноябрда йўл таъмирлаш ишларини тезлаштириш мақсадида ушбу йўл ўтказгичда автомобиллар қатновини чеклаган эди. Хабарда автомобилларнинг йўл ўтказгич бўйлаб бир томонлама ҳаракати 6 декабрга қадар давом этиши таъкидланган эди.

Эслатиб ўтамиз, июнь ойида Тошкент метросининг «Юнусобод» йўлидаги 2 та янги бекат қуриб битказилган эди. Метронинг янги йўналишлари Аҳмад Дониш кўчасидан ўтган. Кўчани таъмирлаш ишлари метро йўналишлари якунланганидан сўнг бошланган. Аҳмад Дониш кўчасининг Амир Темур кўчасидан Тошкент ҳалқа автомобиль йўлигача бўлган 2,2 километр қисми 6 қаторли қилиб қайта қурилган.

Изоҳ
Асосий янгиликлар