Японияда ҳукмрон Либерал-демократик партия собиқ бош вазир Синдзо Абэни парламентга чақиришни таклиф қилди, деб ёзади «Коммерсантъ». Kyodo агентлиги манбаларига кўра, у зиёфатларга пул тўлаш учун маблағлардан ноқонуний фойдаланганликда гумон қилинмоқда.
Агентликнинг ёзишича, бундай тадбирдан мақсад — Синдзо Абэнинг давомчиси, Ёсихид' Сугага нисбатан ишончга путур етказиши мумкин бўлган жамоатчилик қаҳр-ғазабига йўл қўймаслик. Манбаларнинг таъкидлашича, Абэ парламентга йил охиригача чақирилиши мумкин.
Мухолифатчи партияларнинг талаб қилишича, Синдзо Абэ унинг сиёсий фондларини бошқарадиган гуруҳ 2015 йилдан 2019 йилгача ҳашаматли меҳмонхоналарда унинг тарафдорлари учун уюштирилган зиёфатларнинг бир қисмини қоплаш учун 9 миллион иена (тахминан, 90 минг доллар) сарф қилганлиги ҳақидаги айбловларга жавоб бериши керак.
Аввалроқ Япония прокуратураси собиқ бош вазир Синдзо Абэнинг котиблардан бирига нисбатан сайловчиларни сотиб олиш схемаси бўйича иш қўзғатгани, Токио округ прокуратураси Япония собиқ бош вазири Синдзо Абэни 2015 йилдан 2019 йилга қадар Либерал-демократлар партияси тарафдорлари учун ўтказилган банкетларнинг молиялаштирилиши иши бўйича сўроқ қилиш ниятида эканлиги хабар берилган эди.
Эслатиб ўтамиз, Синдзо Абэ 2020 йилнинг августида истеъфога чиққанди. У ҳукумат бошқарувига илк бор 2006 йил келган, 2007 йил вазирларига билдирилган ишонч тушиб кетгани учун амалдан кетганди. Давлат бошқарувига иккинчи бор 2012 йил келган Абэ Японияни бу сафар 7 йилдан ортиқ бошқарди. Иккинчи истеъфосини у саломатлигидаги муаммолар билан изоҳлаганди. Синдзо Абэ ҳукумат бошқарувида рекорд даражада узоқ ишлаган.
Изоҳ (0)