Трамп АҚШ ҳукумати Moderna вакцинасини маъқуллаганини эълон қилди
АҚШ администрацияси зудлик билан Moderna томонидан ишлаб чиқарилган коронавирусга қарши вакцинани тарқатишни бошлайди. Бу ҳақда АҚШ президенти Дональд Трамп 18 декабрь куни маълум қилди, дея хабар қилмоқда «Интерфакс».
«Moderna вакцинаси кўпчилик томонидан маъқулланди. Тарқатиш дарҳол бошланади», – деб ёзди Трамп Twitter’да.
«Европа ва бутун дунёга Хитой вируси (коронавирусни назарда тутмоқда – таҳ.) катта зарба берди. Хусусан, Германия, Франция, Испания ва Италияга. Вакциналар йўлга чиқди!» – дея қўшимча қилди АҚШ президенти.
Аввалроқ АҚШ Озиқ-овқат ва фармацевтика идораси (FDA) мутахассислари гуруҳи Moderna вакцинасидан фавқулодда фойдаланишга рухсат беришни тавсия қилганди.
Bloomberg хабар қилишича, 20 нафар мутахассис вакцинани ёқлаб чиқишди, биттаси бетараф қолди. Ҳеч ким қарши овоз бермади.
Вакцина икки дозадан иборат. Иккинчи доза биринчисидан 28 кун ўтгач қабул қилинади. Вакцинани, тахминан, -20 даража ҳароратда сақлаш керак. Бундай шароитда у олти ойгача сақланиши мумкин.
Moderna вакцинаси Қўшма Штатларнинг шимоли-шарқидаги ишлаб чиқариш корхоналаридан Ирвинг, Техас штатидаги тарқатиш марказига, сўнгра касалхона ва дорихоналарга етказилиши кутилмоқда.
Эслатиб ўтамиз, АҚШда коронавирусга қарши эмлаш расман 14 декабрь куни бошланди. Касалликлар назорати ва профилактикаси марказлари (CDC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда.
1 декабрь куни Moderna АҚШ Озиқ-овқат маҳсулотлари ва дори воситаларининг Санитар назорати бошқармасига (FDA) коронавирус вакцинасидан фавқулодда фойдаланиш учун ариза юборганини эълон қилганди. Аввалроқ унинг самарадорлиги дастлабки таҳлилда 94,1 фоиз, касалликнинг оғир шаклида эса 100 фоиз самарадорлик кўрсатгани маълум қилинганди.
