Тошкентда 20 январгача айрим кўчалар автомобиллар учун ёпилади

Янги йил тантаналари муносабати билан Тошкент шаҳри марказида байрам тадбирлар ўтказилиши режалаштирилган. Шу сабаб шаҳарнинг айрим кўчалари автомобиль ҳаракати учун ёпилади, дея хабар қилмоқда Тошкент шаҳар ҳокимлиги матбуот хизмати.

Қайд этилишича, қуйидаги кўчаларда 2020 йилнинг 20 декабрь куни соат 06:00 дан 2021 йил 15 январь соат 00:00 гача автотранспорт воситаларининг ҳаракати чекланади:

• Буюк Турон кўчасининг А.Навоий ва Матбуотчилар кўчалари оралиғидаги қисми;

• Зарафшон кўчасининг А.Навоий ва Матбуотчилар кўчалари оралиғидаги қисми;

• Истиқлол кўчасининг Буюк Турон кўчаси ва Амир Темур шоҳкўчаси оралиғидаги қисми;

• Мустақиллик шоҳкўчасининг Зарафшон кўчаси ва Амир Темур хиёбони оралиғидаги қисми.

Аввалроқ Тошкентда Фарғона йўли кўчасининг бир қисми 31 декабргача ёпилиши ҳақида хабар берилганди.