Ўзбекистонда 2020 йилнинг 9 ойида товарлар бўйича ташқи савдо айланмаси (олтин ва тузатишларни ҳисобга олган ҳолда) 24,3 миллиард долларни ташкил этди. Бу кўрсаткич 2019 йилнинг 9 ойида 26,2 миллиард долларга тенг бўлган, дея хабар қилмоқда Марказий банк.
Маълум қилинишича, экспорт ҳажми 10,8 миллиард доллар ва импорт ҳажми 13,6 миллиард долларга тенг бўлган. Шу муносабат билан, савдо балансининг дефицити 2,8 миллиард долларни ташкил этди.
Товарлар экспорти ҳажми 2019 йилнинг 9 ойига нисбатан ўзгаришсиз қолган. Олтин ва газнинг экспортдаги улуши мос равишда 54 фоизни ҳамда 3 фоизни ташкил қилди. Шунингдек, энергия ташувчи маҳсулотлар жаҳон нархларининг кескин тушиши ва асосий истеъмолчилар томонидан уларга бўлган талабнинг пасайиши оқибатида газ экспорти ҳажмида 2019 йилнинг 9 ойига нисбатан 78 фоизга камайиш кузатилди.
Шунингдек, 2020 йилнинг 9 ойида товарлар экспортининг ҳажми (олтин экспортини ва тузатишларни ҳисобга олмаган ҳолда) 24 фоизга камайди. Бу кўрсаткич 2019 йилнинг 9 ойида 17 фоизни ташкил қилган.
Экспортнинг асосий қисми қимматбаҳо металлар ва тошлар (5,9 миллиард доллар, 2019 йилнинг 9 ойида 4,1 миллиард доллар), тўқимачилик маҳсулотлари (1,5 миллиард доллар, 2019 йилнинг 9 ойида 1,5 миллиард доллар), келиб чиқиши ўсимлик бўлган маҳсулотлар (850,1 миллион доллар, 2019 йилнинг 9 ойида 1,0 миллиард доллар), қимматбаҳо бўлмаган металлар ва буюмларни (773,9 миллион доллар, 2019 йилнинг 9 ойида 827,9 миллион доллар) ташкил қилган.
Хом ашё товарлари (олтин ва табиий газ) улуши 2020 йил 9 ойида жами экспорт ҳажмининг 57 фоизини ташкил қилди, шундан 54 фоизи олтин ва 3 фоизи табиий газга тўғри келади. Бунда табиий газ экспортининг умумий ҳажмидан 94 фоизи Хитой, 5 фоизи Тожикистон ва 1 фоизи Қирғизистонга тўғри келади.
Изоҳ (0)