Қишлоқ хўжалиги вазирлиги: Ўзбекистонда етиштириладиган техник каннабис таркибидаги гиёҳвандлик моддаси инсон организмига наркотик таъсир кўрсатмайди

АОКАда 17 декабрь, пайшанбу куни  бўлиб ўтган брифингда Қишлоқ хўжалиги вазирлиги ахборот хизмати раҳбари Нигора Хўжаева таркибида гиёҳванд восита мавжуд бўлган техник каннабисни иқтисодий мақсадларда етиштириш қанчалик хавфли, деган саволга жавоб берди.

Техник каннабис — таркибида 0,2 фоизгача миқдорда тетрагидроканнабинол гиёҳвандлик моддаси мавжуд бўлган ўсимлик. Ховос туманида экилган нав Европадан, яъни Франциядан келтирилган бўлиб, унинг таркибида гиёҳванд жуда кам миқдорни ташкил этади. Бу эса тирик организмга ҳеч қандай наркотик таъсир кўрсатмайди. Шу боисдан Ўзбекистонда етиштириладиган техник каннабис ўсимлигининг таркибидаги моддалар инсон организмига умуман салбий таъсир кўрсатмайди. Ўзбекистонда таркибида 0,2 фоизгача миқдорда тетрагидроканнабинол гиёҳвандлик моддаси мавжуд техник каннабис ўсимлигини саноат мақсадларида етиштиришга рухсат этилди. Жумладан, бу кўрсаткич Хитой ва Чехияда — 0,3 фоизгача, Италия, Венгрия, Швеция, Бельгияда 0,2 фоизгача, Россияда — 0,1 фоизгачани ташкил этади.

Нигора Хўжаева, қишлоқ хўжалиги вазирининг ахборот сиёсати масалалари бўйича маслаҳатчиси, матбуот котиби 

Маълумот учун, Ўзбекистон қишлоқ хўжалиги вазирлиги ва Бирлашган Араб Амирликларининг Industrial Innovation Group LLC компанияси ўртасида имзоланган Инвестициялар тўғрисида битимга мувофиқ, 181,9 миллион евро инвестицияларни жалб этиш ҳисобига Сирдарё вилоятида таркибида целлюлоза мавжуд бўлган техник каннабис, зиғир ва бошқа қишлоқ хўжалиги экинларини етиштириш, хом ашёни қайта ишлаб, маҳсулотлар ишлаб чиқаришни назарда тутувчи лойиҳа амалга оширилмоқда.Эслатиб ўтамиз, 2020 йилнинг март ойида Ўзбекистонда саноат мақсадларида каннабис ўсимлигини етиштиришга рухсат берилган эди. Кейинроқ каннабис етиштиришга нима учун рухсат берилганига Адлия вазирлиги изоҳ берганди.