Россия ИИВ мамлакатда мигрантлар сони камайиб кетганини маълум қилди
Бугунги кунда Россияда 6 миллионга яқин мигрант бор, бу ўтган йилларга қараганда сезиларли даражда кам демак. Бу ҳақда мамлакат Ички ишлар вазирлигига таяниб, «РБК» хабар берди.
«Россияга ҳар йили 9 дан 11 миллионгача хорижлик фуқаролар келади. Жорий йилда уларнинг сони аста-секин камайиб бормоқда ва ҳозирча уларнинг сони тахминан 6 миллион кишини ташкил этади», — дейилади хабарда.
ИИВ маълумотларга кўра, Россиядаги хорижликларнинг асосий қисмини йирик шаҳарлар ва иқтисодий марказлардаги меҳнат муҳожирлари ташкил этади. Таъкидланишича, Россияда 1,3 миллион хориж фуқароси патент асосида ишламоқда, яна 85 минг кишида ишлашга рухсатнома бор. Шунингдек, бир миллион кишига вақтинчалик яшаш ёки яшаш рухсатномаси берилган.
Аввалроқ Ўзбекистон Бандлик ва меҳнат муносабатлари вазирлиги Россиянинг бешта шаҳрида рус тили, ўз касби бўйича малака ошириш, янги касб ўрганиш йўналишлар бўйича 1 ойлик (72 соатлик) ва 2 ойлик (144 соатлик) ўқув курслари ташкил этилишини маълум қилганди. Шунингдек, Россияда ўзбек мигрантлари учун касб ва тил ўргатиш тўгараклари йўлга қўйилиши билдирилган.
Мавзуга доир: Россия Қурилиш вазирлиги меҳнат муҳожирларининг мамлакатга киришини соддалаштириш таклифи билан чиқди
