Ўзбекистондаги 12 246 та аҳоли яшаш масканларининг 56,8 фоизида 3G, 95,5 фоизида 4G алоқаси мавжуд эмаслиги аниқланди

АОКА ҳузурида 15 декабрь куни Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги директори ўринбосари Аъзамжон Қурбонов иштирокида брифинг ўтказилди.

Брифингда маълум қилинишича, Ахборотлаштириш ва телекоммуникациялар соҳасида назорат бўйича давлат инспекцияси ҳамда «Электромагнит мослашув маркази» билан биргаликда 2020 йилнинг июнь июль ойларида республика ҳудудидаги 12 246 та аҳоли яшаш масканларида мобил алоқа қамрови ҳолати таҳлил қилинганда, уларнинг 6,6 фоизида 2G, 56,8 фоизида 3G ва 95,5 фоизида 4G алоқаси мавжуд эмаслиги аниқланган.

Шу билан бирга, 115 та аҳоли яшаш масканида бирор-бир мобил алоқа операторининг алоқа қамрови мавжуд эмаслиги, 533 та етиб бориш қийин бўлган аҳоли яшаш масканларидан 313 тасида (ёки 58,7 фоизида) умуман мобил алоқа қамрови мавжуд эмаслиги қайд этилган.

Масалан, Наманган вилоятида истеъмолчиларнинг алоқа хизматлари билан таъминланганлик даражаси таҳлил қилинганда, 4 та мобил алоқа компанияларининг жами 1,7 миллион абонентлари мавжудлиги, уларда жами 1058 та тармоқ алоқа база станциялари ўрнатилганлиги ва бу 1615 та абонентга 1 та антенна тўғри келиши аниқланган. Маълумот учун, 1 та антенна Қозоғистонда 643 нафар ва Россияда 235 нафар аҳолига хизмат қилади.

Аввалроқ Ўзбекистонда коронавирус пандемияси вақтида интернет тезлиги кўтарилгани маълум қилинганди.