Британия ҳукумати касалхонага тушиб қолган Санта-Клаус ҳақида видео чиқарди. Томошабинлар у болаларни қўрқитишини айтгач, видео ўчирилди (видео)

Буюк Британия Соғлиқни сақлаш миллий хизматининг Хайрия ташкилоти (NHS Charities Together) шифокорлар жонлантириш бўлимида Санта-Клаусга ёрдам кўрсатаётгани акс этган видеоролик учун узр сўради, деб ёзади Meduza.

Видео NHS’нинг расмий YouTube каналига декабрь бошида жойланган эди. Лавҳанинг бошида коронавирусга чалинган қария жонлантириш бўлимига тушиб қолади. Шифокорлар унинг ҳаётини сақлаб қолади, шундан кейин уларнинг назорати остида чолнинг соғлиғи касалхона койкасида қайта тикланади, шу билан бир вақтда у жуда кўп сонли хатларга жавоб ёзади. Видео охирида қарияга касалхонадан жавоб берилади, шифокорлардан бири эса Янги йилни кутиб олиш учун уйига келади. У табрикнома ёзилган мактубни ўқиб, шу пайтгача у Санта-Клаусни даволаганини тушуниб етади.

Ролик YouTube фойдаланувчилари томонидан кескин танқидга учради, улар Сантанинг жонлантириш бўлимидаги ҳолати болаларни қўрқитиб юбориши мумкин, деган фикрни билдирди. «Мутлақо жирканч. Даҳшатли хатолик. Болалар шусиз ҳам кўп қийинчиликлар кўрди. Уялмайсизми?» — дейилади видеога ёзилган энг оммабоп изоҳлардан бирида.

Охир-оқибат Соғлиқни сақлаш миллий хизмати уни ўз каналидан ўчириб ташлади. У ердагилар таъкидлашича, видео катталар аудиторияси учун мўлжалланган бўлиб, болалар кўриши эҳтимоли катта бўлган телевидение орқали намойиш қилинмаган. Фарзандлари «рекламани кўрганидан кейин хафа бўлган» ота-оналардан ташкилот узр сўради.