Жигарнинг ёғ босиши — ҳужайраларда ортиқча миқдордаги ёғ тўпланиб, бутун орган ҳажмининг 10 фоизгача бўлган жойини эгаллайди ва сурункали жигар касалликлари ривожланишига олиб келади. Жигарда ортиқча ёғ тўпланишининг энг кенг тарқалган сабаби спиртли ичимликларни истеъмол қилишдир. Аммо сўнгги ўн йилликда умуман спиртли ичимлик истеъмол қилмаган инсонлар ҳам жигарда ёғ тўпланиш ҳолатларига дуч келмоқда. Жигар циррози ёки саратонини қўзғатиши мумкин бўлган ушбу касаллик аломатсиз бўлиб, қорин бўшлиғи аъзолари мунтазам равишда текширилиб, таҳлил натижаларидан кейингина аниқланиши мумкин. Жигарда ёғ тўпланиши хавфини жиддий равишда оширадиган айрим омиллар ва аломатлар билан қуйида танишиш мумкин.
Иштаҳанинг ортиши
Ривожланаётган касалликни аниқлаш мумкин бўлган дастлабки аломат — бу доимий очлик ҳиси. Шунингдек, ширинлик ва ёғли таомларга бўлган эҳтиёжнинг ортиши. Агар ушбу аломатларга вақтида эътибор қаратилмаса ёки уларни истеъмол қилиш даражаси ортса, жигарда ёғ тўпланиши ҳолати кузатилади ва касаллик ривожланади.
Қорин соҳасида ёғ йиғилиши
Ички аъзолар атрофида ҳосил бўладиган ёғ нафақат бир қанча қийинчиликлар туғдиради, балки хавфли ҳам ҳисобланади. Қорин ва белнинг катталиги 85 сантиметрдан ошган одамларда юрак-қон томир касалликлари, диабетнинг иккинчи тури ва жигарни ёғ босиши хавфи юқори бўлади. Агар ушбу ҳолат кузатилган бўлса, йилига камида бир марта ички аъзоларни текширтириб кўриш керак. Шунингдек, ортиқча вазнни йўқотиш усуллари ҳақида ҳам мутахассис билан маслаҳатлашиш керак.
Юқори холестерин миқдори
Қонда триглицерид ёки холестерин миқдорининг ортиши жигарда ёғ тўпланишининг белгилари бўлиши мумкин. Холестерин ишлаб чиқарадиган ва уни қонга тарқатадиган жигар ҳисобланади. Шунинг учун рациондан тўйинган ёғларни ўз ичига олувчи жуда кўп миқдорда озиқ-овқат ўрин олган бўлса, жигар яна ҳам кўпроқ холестерин ишлаб чиқаради. Ушбу кўрсаткич миқдори ортиб борса, нафақат юрак ва қон томирлар, балки жигарга ҳам алоҳида эътибор талаб этилади.
Қандли диабетнинг иккинчи тоифаси
Агар беморда қандли диабет касаллиги аниқланса, доимий жигар текширувлари ва тиббий кузатувлар олиб борилиши керак. 2016 йилда Калифорния университети олимлари олиб борган тадқиқот шуни кўрсатдики, қандли диабетнинг иккинчи тоифаси билан касалланган беморларнинг 65 фоизида жигарнинг ёғ босиши ҳолатлари мавжуд.
Юқори қон босими
Жигарнинг ёғ босиши билан касалланган беморларда гипертония ушбу касалликка чалинмаганларга қараганда уч марта кўпроқ учрайди. Агар юқори қон босими кузатилса, жигарни текширтириш муҳим. Шунингдек, жигарнинг ёғ босиши ташхиси қўйилса, қон босими ва юрак саломатлигини диққат билан кузатиш керак.
Ирсият
Оила аъзоларининг бирортасида жигарда ёғ тўпланиши кузатилган бўлса, бунда бошқа вакилларда ҳам ушбу касаллик хавфи 13 баравар юқори. Жигарнинг ёғ босиши, афсуски, ирсий касаллик ҳам ҳисобланади.
Доимий чарчоқ ҳиси
Жигарнинг ёғ босишини қон текшируви ёки биопсиясиз аниқлашга ёрдам берадиган жисмоний аломатлар йўқ. Аммо доимий чарчоқ ва заифлик ҳиси энг яққол белги бўлиб, бундан сўнг, албатта, шифокор билан маслаҳатлашиш зарур.
Қорин бўшлиғининг ўнг томонида оғриқ
Ушбу аломат ўзини жуда кеч намоён қилиб, одатда касалликнинг аллақачон ривожланиб бораётган асоратлари ҳақида белги беради. Қориннинг ўнг томонидаги оғриқлар вақти-вақти билан ва тартибсиз равишда пайдо бўлса, дарҳол шифокорга мурожаат қилиш керак.
Изоҳ (0)