Тошкент вилояти Оҳангарон туманида газоблок ишлаб чиқариш корхонаси табиий газдан ноқонуний фойдаланган ҳолда оҳак ишлаб чиқараётгани аниқланди. Бу ҳақда Энергетика вазирлиги хабар берди.
Вазирлик томонидан маълум қилинишича, 2020 йилнинг 7 декабрь куни Оҳангарон тумани Нуробод қўрғонида жойлашган Меgа Block Investment МЧЖга қарашли газоблок ишлаб чиқариш корхонасининг табиий газдан фойдаланиш ҳолати ўрганилганда, жамият томонидан ноқонуний равишда табиий газдан фойдаланган ҳолда оҳак маҳсулоти ишлаб чиқариш фаолияти билан шуғулланиб келаётганлиги аниқланган.
Қайд этилишича, мазкур жамият «Ҳудудгаз Тошкент» МЧЖ томонидан 2019 йил 2 декабрда берилган 0332-сонли техник шартга кўра қиш мавсумида табиий газ етказиб берилиши кафолатланмаган истеъмолчилар тоифасига киради. «Ҳудудгаз Тошкент» газ таъминоти филиали ва Меgа Block Investment МЧЖ ўртасида 2020 йил 1 июль куни тузилган шартномада жамиятда фақатгина газобетон ишлаб чиқариш ускунаси ҳамда маиший газ жиҳозлари мавжудлиги кўрсатилган.
Бундан ташқари, 2020 йил 1 ноябрь ҳолатига кўра, жамиятнинг табиий газдан 135 миллион сўм дебитор қарздорлиги мавжуд бўлган.
Аниқланишича, компания 313 та ностандарт газ ёндиргичи билан жиҳозланган 3 та хумдонда оҳак маҳсулоти тайёрлаб келган. Шу билан бирга, газобетон ишлаб чиқариш ускунаси ҳамда маиший газ жиҳозларида сарфланган газ миқдорлари ҳисобини юритиш учун ўрнатилган ҳисоблагич ҳам носоз бўлганлиги тахмин қилинмоқда.
Дастлабки ҳисоб-китобларга кўра, 3 189,5 минг куб метр газ талон-торож қилинган ва жами 3,18 миллиард сўм зарар етказилганлиги аниқланган. «Мазкур 3 189,5 минг метр куб табиий газ ўртача 3500 дан зиёд ҳовли-уйларнинг бир ойлик эҳтиёжини қондириш имконини беради», — дейилади вазирлик хабарида.
Ҳозирги кунда ҳуқуқни муҳофаза қилувчи органларга топшириш учун бирламчи ҳужжатлар расмийлаштирилмоқда.
Изоҳ (0)