Сурхондарё вилоятининг Қизириқ туманида икки гўзаллик салони ишчилари ўртасида юз берган жанжал жиноят иши қўзғатилиши билан якунланди. Бу ҳақда ИИВ Тергов департаменти хабар берди.
Маълум бўлишича, 9 ноябрь куни соат 11:00 да жамоат жойи ҳисобланган Қизириқ марказий деҳқон бозори орқа томонида жойлашган «Шадози» номли гўзаллик салони биносида ушбу салонда ишловчи 37 ёшли аёл З.Ш., 22 ёшли П.Н., 20 ёшли С.А., 17 ёшли С.Т. ҳамда ушбу гўзаллик салони ёнида жойлашган «Диана» гўзаллик салони ишчиси 39 ёшли М.М. ва унинг қизи 18 ёшли Ш.Н. ўзаро жанжаллашган.
Оқибатда 22 ёшли П.Н., 20 ёшли С.А. ва 17 ёшли С.Т.га турли даражада тан жароҳатлари олгани аниқланган. Суд-тиббий экспертиза хулосасига кўра, қизлар олган жароҳат енгил тан жароҳати деб баҳоланган.
Ҳолат юзасидан Қизириқ туман ИИБ ҳузуридаги тергов гуруҳи томонидан М.М. ва бошқаларга нисбатан Жиноят кодексининг 277-моддаси 2-қисми «б» банди (безорилик) билан жиноят иши қўзғатилган.
Ҳозирда тергов ҳаракатлари олиб борилмоқда.
Изоҳ (0)