Шавкат Мирзиёев туман марказлари ва шаҳарларда «Саломатлик йўлаклари» қуриш бўйича вазифаларни белгилаб берди

Президент Шавкат Мирзиёев раислигида 9 декабрь куни туризм ва спорт соҳаларида амалга оширилаётган ишлар ҳамда 2021 йилдаги вазифалар муҳокамаси юзасидан видеоселектор йиғилиши ўтказилди. Бу ҳақда Президент матбуот хизмати хабар берди.

Йиғилишда аҳолини оммавий спортга кенг жалб қилиш масалалари ҳам муҳокама қилинди.

«Бугунги кунда аҳолимизнинг бор-йўғи 19 фоизи жисмоний тарбия ва спорт билан қамраб олинган. Аксинча, носоғлом турмуш тарзи, таркибида туз, қанд ва ёғ миқдори кўп бўлган ҳамда хамирли таом ва нонни меъёридан ортиқ истеъмол қилиш ҳолатлари кўп учрайди.

Коронавирус инфекцияси, аввало, юрак-қон томир, нафас йўллари касаллигига чалинган, ортиқча вазнли фуқароларда оғир кечгани ҳаммага маълум. Бу ҳам соғлом турмуш тарзи ва спортнинг аҳамиятини яна бир бор яққол кўрсатди», — дейилади хабарда.

Президентнинг 2020 йил 30 октябрдаги фармонида соғлом турмуш тарзини кенг татбиқ этиш ва оммавий спортни янада ривожлантириш бўйича чора-тадбирлар белгиланган. Жумладан, туман марказлари ва шаҳарларда 3—5 километрли «Саломатлик йўлаклари» барпо этиш вазифаси қўйилган.

Йиғилишда шу борадаги манзилли рўйхатни шакллантириб, қурилиш ишларини бошлаш, пиёдалар ва велосипедлар учун барча қулайликларни яратиш бўйича кўрсатмалар берилди.

Президент жойларда спорт инфратузилмасини ривожлантириш масаласига алоҳида эътибор қаратди. Хусусий спорт иншоотлари, воркаут, мини-футбол, бадминтон, стритбол майдонлари ва фитнес-заллари барпо этишга тадбиркорларни жалб қилиш бўйича топшириқлар берилди.

Мамлакатда халқаро спорт мусобақаларини ўтказиш орқали спорт туризмини ривожлантириш кераклиги таъкидланди. Хусусан, халқаро мототур ва велотур мусобақалари ташкил этилади, бунинг учун мамлакат ҳудудларидан Бўстонлиқ туманигача маршрут ишлаб чиқилади.

Аҳоли ўртасида жисмоний тайёргарлик даражаси бўйича спорт синовларини йўлга қўйиб, унинг ғолибларига имтиёзлар берилиши белгиланди. Бу биринчиликларни навбатда мактаб ўқувчилари ўртасида, босқичма-босқич аҳоли ўртасида ташкил этиш кераклиги қайд этилди.

Қайд этилишича, Ўзбекистондаги ҳар бир туман ва шаҳар биттадан устувор, истиқболли ҳамда ривожланаётган спорт турларига ихтисослаштирилган. Мазкур тизимдан келиб чиқиб, ҳудудда йирик мусобақалар ўтказиб туриш ва салоҳиятли спортчиларни тарбиялаш муҳимлиги таъкидланди. Бунинг учун Миллий олимпия қўмитаси барча спорт федерациялари фаолиятини туман ва шаҳарларга боғлаган ҳолда ташкил этиб, жойларда Олимпия ҳаракатини ривожлантириб боради.