Хонанда Жаҳонгир Отажонов Instagram’даги саҳифаси орқали мухлисларига мурожаат қилиб, санъатни тарк этгани, бошқа қўшиқ куйламаслигини маълум қилди.

Ассалому алайкум, азиз дўстлар, мана ва ниҳоят, Аллоҳни иродаси билан ўзимни бир-икки йилдан бери қийнаб келаётган саволларга ушбу дақиқаларда жавоб топдим, деб ўйлайман. Иншаллоҳ, ўзим яхши кўрган, мани шунча даражага етказган, халқимиз орасида озми кўпми обрў-эътибор қозонишимга сабабчи бўлган мусиқачилик касбим билан Аллоҳ учун шариатимизга тўғри келмагани учун воз кечишга журъат қилдим.

Ҳаммаларингга каттакон раҳмат, йиллар давомида мени олқишлаб, қўшиқларимни эшитиб, шунчалик ҳурмат-эътибор қилганинглар учун, ҳаммаларингдан Аллоҳ рози бўлсин! Ва шу қаторда мендан хафа бўлган, саҳна ишларимдан норози бўлган дўстларимизга, юртдошларимизга ҳам соғлик-саломатлик тилайман, мендан рози бўлишликларини сўраб қоламан, Аллоҳ барчадан рози бўлсин. Бугундан бошлаб менга мусиқачилик касбим бўйича мурожаат қилманглар, 1 январгача олинган тўй ва концертларимиз бор, олдиндан олинган ‘закладъларни бемалол мурожаат қилиб қайтариб олишинглар мумкин. Мен у саҳналарда иштирок эта олмайман, Аллоҳ менга бу касб билан видолашишликни насиб қилди. Ўзи хайрлик қилган бўлсин, барчангларга икки дунё саодатини берсин. Мухлисларимдан бир илтимосим бор, сизлардан илтимос, менинг мусиқаларимни YouTube’дан ўчириб ташлашни сўрайман. Зотан, мусиқа шариатда номақбул ҳисобланаркан, сизларнинг ҳам гуноҳкор бўлишингларга сабабчи бўлишни хоҳламайман. Соғ-саломат бўлинглар!

Жаҳонгир Отажонов, хонанда

Аввалроқ Жаҳонгир Отажоновнинг «Ўйнасин» қўшиғига ишланган клипи интернет фойдаланувчиларининг танқидларига сабаб бўлган эди. Улар клипнинг айрим саҳналари украиналик хонанда Макс Барскихнинг «Соҳиллар» («Берега») клипидан кўчирилганини айтиб, Жаҳонгир Отажоновни кўчирмакашликда айблаган эди. Ушбу клипни суратга олган режиссёр Ҳабибулло Набиев эса саҳналарни суратга олишда бир неча хонандаларнинг ижод маҳсулидан илҳомлангани, улар айнан Макс Барскихдан кўчирилмаганини таъкидлаган эди. Жаҳонгир Отажонов айбловлардан сўнг клипни YouTube’дан ўчириб ташлади.