Андижонда 3 нафар мактаб ўқувчиларининг зирагини алдаб, ечиб олган аёл қўлга олинди, дея хабар бермоқда Тергов департаменти.
Қайд этилишича, 2020 йилнинг 26 ноябрь куни соат 12:30 ларда фуқаро 26 ёшли Зулфияхон И. ўзганинг мулкини талон-торож қилиш мақсадида мактаб ўқувчилари ҳисобланган вояга етмаган 8 ёшли Райёна Ш. ва 7 ёшли Зарина А.нинг ёлғиз келаётганлигидан фойдаланиб, уларга байрам тадбирга олиб боришни айтган. Шундан сўнг аёл Райёна Ш. ва Зарина А.нинг қулоғидан 2 жуфт зиракларини ечиб олиб, ҳодиса жойидан яширинган.
Шунингдек, 2020 йилнинг 27 ноябрь куни соат 13:00 ларда фуқаро Зулфияхон И. ўзининг жиноий ҳаракатларини давом эттириб, такроран ўзганинг мулкини талон-торож қилиш мақсадида Андижон шаҳар А.Темуршоҳ кўчасида мактаб ўқувчиси вояга етмаган 9 ёшли Муниса Н.ни ёлғиз келаётганидан фойдаланиб, унга байрам тадбирида иштирок этишини айтиб алдаган. Шундан кейин аёл бу қизнинг ҳам қулоғидан бир жуфт зиракларини ечиб олиб, ҳодиса жойидан яширинган.
Терговга қадар текширув давомида гумон қилинувчи Зулфияхон И.дан жабрланувчилар Райёна Ш. ва Зарина А.га тегишли бўлган сирғалар ашёвий далил тариқасида расмийлаштириб олинган.
Мазкур ҳолат юзасидан Андижон шаҳри бўйича ИИО ФМБ ҳузуридаги тергов бўлими томонидан Зулфияхон И.га нисбатан Жиноят кодексининг 169-моддаси 3-қисми «а» банди (ўғрилик) билан жиноят иши қўзғатилган. Ҳозирда тергов ҳаракатлари давом эттирилмоқда.
Аввалроқ Наманганда 15 ёшли бола дўкондан 16 та телефон ўғирлагани, Тошкентда бувисининг тилла тақинчоқлари ва пулларини ўғирлаган 21 ёшли қизга жиноят иши қўзғатилгани ҳамда Бухорода қўшнисининг уйидан қиймати 8,5 миллион сўмлик буюмларни ўғирлаган 17 ёшли қиз қўлга олингани ҳақида хабар берилганди.
Изоҳ (0)