Самарқанд вилоят болалар кўп тармоқли тиббиёт марказида сўнгги икки йилда 700 нафар бола юрак жарроҳлик амалиётини ўтказгани учун ногиронликдан халос бўлди. Бу ҳақда «Дарё» мухбири Фарҳод Норбўтаев хабар берди.

Фото: «Дарё»

«Юрагида нуқсони бўлган болалар операциягача ногиронлик нафақасини олган. Операциядан олти ой ўтганидан сўнг улар ногиронликдан чиқарилмоқда. Шундай оилалар борки, уларда иккита, ҳатто учтагача ногирон бола бор. Ўтказилган операциядан сўнг фарзанди соғлом инсонлар қаторига қўшилаётганлиги, оилаларда умид уйғотмоқда» , — дейди Самарқанд вилоят болалар кўп тармоқли тиббиёт маркази кардиохирургия бўлими бошлиғи Нисо Турдиева.

Маълум бўлишича, мазкур муассасага охирги бир ярим йил ичида Қашқадарё, Сурхондарё, Жиззах, Андижон, Фарғона, Хоразм ва Тошкент вилоятларидан беморлар келиб даволанмоқда.

Муассаса бош шифокори Маматқул Азизовнинг таъкидлашича, муассасада Самарқанд вилоятида 0-16 ёшгача 11121 нафар ногирон бола рўйхатга олинган. Касалликлари бўйича энг кўп контенгент бош мия ва нерв системаси патологиялари билан рўйхатда туради.

Фото: «Дарё»

«Жорий йилнинг ноябрь ойида марказ мутахассислари томонидан вилоятнинг барча туманларидаги икки ва ундан ортиқ ногирон фарзандлари бор 75 та оиланинг 155 нафар ногирон фарзанди уйига бориб кўрилди. Кўрик давомида беморларнинг тиббий ва социал аҳволи ўрганилди. Даволаш ва реабилитация қилиш бўйича йўл харитаси тузилди. Режа асосида 155 нафар боланинг 74 нафари чуқурлаштирилган тиббий кўрикдан ўтиш ва реабилитация қилиш мақсадида марказимизга ётқизилди», — дейди Маматқул Азизов.

3 декабрь — Халқаро ногиронлар куни муносабати билан беморлар учун марказда байрам тадбири уюштирилган. Тадбирда ногирон бемор болалар учун Самарқанд вилояти қўғирчоқ театри актёрлари ва 24-мусиқий мактаб ўқувчилари томонидан концерт дастури тақдим этилган.