Бугун,

  • USD 11095.31
  • RUB 173.84
  • EUR 10772.44

2021 йилнинг баҳорига келиб олтита компаниянинг коронавирусга қарши вакцинаси фойдаланишга тайёр бўлиши мумкин. «РБК»нинг ёзишича, бу ҳақда Singapur FinTech фестивалида Microsoft асосчиларидан бири, миллиардер Билл Гейтс маълум қилди. Унинг сўзларини CNBC телеканали эфирга узатган.

Фото: AFP

Фото: AFP

«Менимча, 2021 йилнинг биринчи чорагига қадар олтита вакцина маъқулланади», — деган Гейтс яқин келажакдаги вакцинация тўғрисидаги саволга жавобан. Унинг сўзларига кўра, AstraZeneca, Johnson & Johnson, Novavax, Pfizer/BioNTech ва Moderna компанияларининг вакциналари тез орада тасдиқланиши мумкин. Олтинчи компания номини эса келтирмаган.

Билл Гейтснинг таъкидлашича, вакциналар тайёр бўлгандан сўнг жаҳон ҳамжамиятининг муҳим вазифаси уларни ривожланган ва ривожланаётган мамлакатларда тенг тақсимлаш бўлади. «Биз адолатли равишда тарқатишимиз ва вакцинадан фойдаланиш бойлик даражасига боғлиқ эмаслигига ишонч ҳосил қилишимиз керак», — деган у. У кейинги йилда вакцина пайдо бўлиши 2022 йилда COVID-19 пандемиясини енгиб ўтишга ёрдам беришига умид билдирди.

CNBC’нинг қайд этишича, Гейтс ва унинг рафиқаси Мелинда фонди Ҳиндистоннинг Серум институти билан ҳамкорликда AstraZeneca коронавирусга қарши вакцинасини ишлаб чиқариш ва тарқатиш устида иш олиб бормоқда.

Аввалроқ Билл Гейтс коронавирусга қарши дастлабки вакциналар самарадорлиги идеал бўлмаслиги мумкинлигини айтганди. «Агар омад кулиб боқса, бизда ҳозир учинчи босқич синовида бўлган олти препаратдан икки ёки учтаси бўлади. Pfizer’да биринчи бўлиш имконияти бор. У вакциналар ишлаб чиқариш бўйича жуда тажрибали компания ва у ўз тадқиқотини жуда пухта режалаштирган», — деган эди Гейтс.

Айни пайтда Билл Гейтс санаб ўтган вакциналардан Pfizer/BioNTech концерни томонидан ишлаб чиқилган вакцина тасдиқланди. Ҳозирча фақат Буюк Британияда ундан фойдаланишга рухсат берилган.

Ноябрь ойининг бошида Pfizer ва BioNTech ўзларининг БНТ162б2 вакцинаси учинчи босқич синовларида 90 фоиз самара кўрсатганини эълон қилди. Бир ҳафта ўтгач, компаниялар вакцинанинг самарадорлиги 95 фоиз эканлигини маълум қилди. Шунингдек, Moderna ҳам вакцина самарадорлигини дастлабки таҳлилда 94,1 фоиз, касалликнинг оғир ҳолатларида эса 100 фоиз деб баҳолади.

8 декабрь куни Pfizer ва BioNTech вакцина синовларини ўтказиш чоғида олти киши (вакцина олинаётган гуруҳда икки киши, плацебо гуруҳида эса тўрт киши) вафот этгани маълум бўлди. Вакцина олаётганлар гуруҳидаги биринчи қурбон атеросклероз ва семизликдан азоб чеккан. Кўнгилли дорининг биринчи дозаси юборилганидан кейин уч кун ўтиб вафот этган. Вакцина олаётганлар гуруҳида вафот этган иккинчи иштирокчида эса иккинчи доза киритилганидан кейин 60 кун ўтиб, юрак тўхтаб қолган, яна уч кундан кейин унинг ўлими қайд этилган.

FDA 10 декабрь кунги мажлисида Pfizer ва BioNTech компаниялари вакцинасидан фойдаланишни маъқуллаш-маъқулламаслик масаласини ҳал қилади. Moderna компанияси ишлаб чиққан яна бир вакцинани рўйхатдан ўтказиш масаласи эса келаси ҳафта, 17 декабрь куни кўриб чиқилади.

Жонс Ҳопкинс университетининг сўнгги маълумотларига кўра, дунёда 68 миллиондан ортиқ киши коронавирус билан касалланган, уларнинг 1,5 миллиондан ортиғи вафот этган. Касалланганлари сони бўйича АҚШ етакчилик қилмоқда (15,1 миллион нафар). Ундан кейинги ўринларда Ҳиндистон (9,7 миллион) ва Бразилия турибди (6,6 миллион).

Изоҳ
Асосий янгиликлар
Маҳаллий
Тошкент шаҳар Ободонлаштириш бош бошқармасига янги раҳбар тайинланди
Дунё
Грета Тунберг тўртинчи бор тинчлик бўйича Нобел мукофотига номзод бўлди
Маҳаллий