Буюк Британия дунёда биринчи бўлиб коронавирусга қарши оммавий вакцинацияни бошлайди, деб хабар беради CNN.

Фото: Bloomberg

Вакцинация Pfizer/BioNTech компаниясининг вакцинаси орқали бошланади. Вакцинани Цельсий бўйича 70 даража совуқда сақлаш лозимлиги ва ҳар бир беморга уч ҳафта фарқи билан иккитадан доза берилишига сабаб вакцинация жараёни мураккаб ҳисобланади.

Вакцинанинг биринчи дозалари билан Англия, Уэльс ва Шотландия аҳолиси эмланади. Шу билан бирга, Шимолий Ирландия эмлаш ишларини ҳафта бошида бошлашини маълум қилган, бироқ айнан қайси кунлигига ойдинлик киритмаган. Биринчи навбатда вакцина билан қариялар уйидаги кексалар ва тиббий-ижтимоий муассаса ходимлари эмланади. Шунингдек, 80 ёшдан катталар ва тиббиёт ходимлари вакцинация жараёнида устуворликка эга.

Ўз навбатида Буюк Британия соғлиқ сақлаш соҳасининг расмий вакиллари декабрь охирига қадар Pfizer/BioNTech вакцинасининг 4 миллион дозаси тайёр бўлишини кутмоқда. Айни вақтда мамлакат ушбу вакцинадан 40 миллион доза харид қилган бўлиб, бу аҳолининг учдан бир қисмига етади.

Эслатиб ўтамиз, 2 декабрь куни Буюк Британия дунёда биринчи бўлиб Pfizer’нинг коронавирусга қарши вакцинасидан фойдаланишни маъқуллаган. 4 декабрь куни эса Баҳрайн ҳам Pfizer вакцинасидан фойдаланишни маъқуллади. Шунингдек, Pfizer ва BioNTech вакцинани АҚШда ҳамда Евроиттифоқда рўйхатдан ўтказиш учун ариза берган.