«Ўзбекнефтгаз» раҳбари Чиноз нефть базасидаги ёнғин нега 8 соат давом этганига изоҳ берди

«Ўзбекнефтгаз» бошқаруви раиси Меҳриддин Абдуллаев Чиноз нефть базасидаги ёнғин нега 8 соат давом этгани бўйича берилган саволга жавоб берди. Бу ҳақда «Uzreport ТВ» телеканали маълум қилди.

«Чиноздаги ёнғин меҳнат хавфсизлигига риоя этилмагани учун содир бўлди. Ёнган идишда юз тоннага яқин маҳсулот бўлган.

Биз ёнган маҳсулотни ўчиришга эмас, унинг атрофидаги идишларни қўриқлашга ҳаракат қилдик. Чунки базада 40 минг тоннагача маҳсулот бор эди, ёнаётган маҳсулотни бошқасига кўчириб ўтказишнинг имкони йўқ эди.

Ўт ўчирувчилар ўт ўчириш билан эмас, атрофидаги идишларни қўриқлагани учун ҳам ёнғин 8 соатга чўзилиб кетган.

Ёнғинда 6 киши жароҳат олган эди. Уларнинг ҳаммасининг аҳволи яхши, уйида даволаняпти», – дейди Меҳриддин Абдуллаев.

Эслатиб ўтамиз, 26 ноябрь куни Тошкент вилоятининг Чиноз туманидаги «Пахта Нефтьбазаси»да 5 минг тонна сиғимли ёқилғи цистернаси ёниб кетди. Воқеа жойига ФВВнинг 35 та махсус техникаси ҳамда 130 нафар ходими жалб этилган эди.