Ҳаммаси ортда қолди: Майк Тайсон ва Рой Жонс ўртасидаги жанг якунланди! 90 йилларнинг афсоналари умумий ҳисобда 105 ёшида жанг ўтказди, беллашув икки дақиқадан давом этган 8 раунддан иборат бўлди. Шунга қарамай улар қисман бўлса-да, ёқимли носталгияни қайтаришга муваффақ бўлди. Жанг тахмин қилинганидек, ўта зерикарли ва ёмон ўтмади, балки жангчилар яхшигина қарама-қаршиликни юзага келтира олди.
Тайсон, албатта, энг яхши йилларида бўлгани каби ҳаракат қилди ва зарбалар беришга уринди, Жонс эса бу жараёндан жуда мамнун эди. Буларнинг барчаси биргаликда кўргазма эмас, балки ҳақиқий жанг руҳини бера олди.
Бироқ кўнгилни хира қилган асосий жиҳат, дуранг натижанинг эълон қилиниши ва ғалати ҳисоб-китоб ишлари бўлди. Ҳакамлар ҳайъатида уч нафар собиқ Жаҳон чемпиони (лицензияси йўқ) бор эди ва уларнинг ҳар бири жангни турлича кўрди. Умуман олганда, Майк ва Рой натижадан норози эмас, аммо уларнинг ҳар бири ўзини ғолиб ҳисобламоқда.
Тайсон ҳақиқатан ҳам яхши формада. Аммо жуда оддий ҳаракат қилди. Жонс эса рингни яхши ҳис қилди
Ушбу жангнинг расмий мақомда ўтмаганининг икки асосий омили, бу раундлар вақти ва қўлқоплардир. Одатий уч дақиқалик раунд ўрнига Тайсон ва Жонс икки дақиқадан жанг қилган бўлса, уларга 10 унсия (283,5 грамм) қўлқоплар ўрнига 12 унсия қўлқоплар (340,2 грамм) берилди. Одатда 12 лик қўлқоплардан спарринг жангларида фойдаланилади.
Буларнинг барчасига етарли сабаблар бор эди: Тайсон 54 ёшда бўлиб, у 15 йилдан бери жанг қилмаётган ва яқиндагина машғулотларга киришганди. Жонснинг ҳолати нисбатан яхшироқ бўлса-да, охирги марта у 2018 йилда жангда иштирок этган ва ҳозирда 51 ёшни уриб қўйган. Шу сабабли, икки дақиқалик раундлар боксчиларни жанг бошланиши билан чарчаб қолишдан, томошабинларни эса зерикарли ва бир хил темпли жангдан халос бўлишга имкон яратди. Шу билан бирга, қўлқоплар спортчиларнинг соғлиғини асрашга ёрдам берди.
Жангнинг пулли трансляцияси 50 долларни ташкил қилди. Нима учун бундай рақамлар юзага келди, деган саволга эса қуйидаги биргина изоҳ жавоб бўла олади:
«Мен трансляцияни 17 ёшда бўлганим учун сотиб олдим, ҳеч қачон Майк Тайсоннинг жангини жонли равишда кўрмаганман. Энди эса мен ҳеч бўлмаганда уни телевизорда жонли равишда кўрганман деб айта оламан. Бу ягона сабаб».
Йигитча сарфлаган пулларига деярли афсусланмади, боиси ҳақиқат кутилганидан яхшироқ бўлиб чиқди. Жангнинг 16 дақиқаси давомида биз ночор аҳволдан йиқилаёзган кекса кишиларни кўрмадик, бироқ шу билан бирга рақибига зарба беришдан қўрқаётган боксчилар ҳам кўзга ташланмади.
Тайсон зудлик билан босим ўтказишни бошлади, ўз услубини қўллаб, масофани қисқартиришга ҳаракат қилди. Жонс эса ринг марказини рақибига берди, аммо у худди энг яхши йилларида бўлгани каби оёқлари билан Майкни ринг бўйлаб айлантирди ва уни «жеб»ларда ушлаб туришга ҳаракат қилди. Бир неча бор Майк жуда хавфли зарбалар берди, улар эса шундоққина Ройнинг жағи ёнидан ўтиб кетарди.
Тайсон яқин масофада бўлганида, Жонс «клинч»дан оқилона фойдаланди ва шу тариқа Майкнинг кучини зарарсизлантирди. Жанг Тайсоннинг муносиб формада эканини кўрсатиб берди.
Деярли барча 8 раунд худди шу сценарий бўйича ўтди: Майк масофани йўқ қилишга, Рой эса аксинча, оёқ ҳаракатлари билан уни ўзига яқинлаштирмасликка ҳаракат қилди. Фақатгина жанг охирига келиб, Жонс бироз қўшди (у яхши тезликда бир нечта тўғри ва қанот зарбаларини йўллади). Тайсон бу вақт давомида Жонсни нокаут қилишга уринди, аммо Ройнинг юқорида қайд этилган ҳаракатлари бунга имкон бермади.
«Бу мен кўрган энг яхши кўргазмали жанг», – деб ёзди Жорж Форман жанг якунланиши билан. Бу борада у билан баҳслашиш қийин эди. Чунки жанг ҳақиқий носталгия ҳисларини бера олди.
Дуранг эмас, балки ҳакамларнинг баҳосидаги тарқоқлик ажаблантирди. Учала расмий ҳакам ҳам лицензиясиз собиқ Жаҳон чемпионлари эди
Дастлаб Калифорния штати атлетик комиссияси беллашувда ҳакамларни кўришни истамади. Ташкилот раҳбари Энди Фостер жангда ҳисоб-китоб олиб борилмаслиги, шунга кўра ғолиб аниқланмаслигини айтганди. Бироқ у ён беришга мажбур бўлди, шунинг учун ҳакамлар профессионал бўлмаса-да тайинланди. Ҳакамлар гуруҳидан Кристи Мартин, Чед Доусон ва Винни Пациенца ўрин олди.
Мартин ҳозир 52 ёшда, у бокс тарихидаги илк энг яхши аёл жангчилардан бири ҳисобланади. Кристи WBC чемпиони унвонига сазовор бўлган, унинг статистикаси эса қуйидагича, 49 ғалаба (31 та нокаут), 7 мағлубият ва 3 дуранг.
Доусон эса бир йил олдин ўзи жангларда қатнашарди. Умуман олганда, у енгил вазн тоифасида яхши натижаларга эришган (40-5). Чед турли вақтларда WBC ва IBF чемпионлик унвонларини қўлга киритган, шунингдек, у 2012 йилда The Ring журнали унвонини ҳам қўлга киритган.
Ҳакамлар гуруҳининг энг тажрибали аъзоси 57 ёшли Пациенса эди. У икки вазн тоифасида Жаҳон чемпионлигини қўлга киритган. 1995 йилда эса у Рой билан жанг қилганди. Ўшанда Жонс олтинчи раундда техник нокаут билан ғалаба қозонган. Винни 2004 йилда, Майк Тайсондан бир ярим йил олдин қўлқопларини михга илган.
Умумий ҳисобда ушбу учлик дуранг натижани қайд этди ва ҳамма ўз билганича бал қўйди:
- Кристи Мартин ғалабани Тайсонга берди – 79-73.
- Винни Пациенца ғалабани Жонсга берди – 80-76.
- Чед Доусон дуранг натижани қайт этди – 76-76.
Тайсон ва Жонс жангдан мамнун
Жанг натижасини эълон қилиш ҳам ғайриоддий кечди: ринг-диктор Майкл Баффер Тайсон ва Жонсни рингдан чиқариб, улкан экран олдига туширди ва шундан кейингина барчаси дуранг билан тугаганлигини эълон қилди. Айнан шу ерда улардан интервью олинди.
«Мен ҳакамларнинг қароридан рози эмасман. Мен Тайсонни мағлуб этдим. Албатта, мен унинг зарбаларини, айниқса танамга урганини сездим, бироқ ўзимни яхшироқ ҳаракат қилдим деб ўйлайман», – дейди Рой Жонс.
Табиийки, Майк ҳам ўзини ғолиб деб ҳисоблайди. Фақат у буни бошқачароқ айтди:
«Ўйлайманки, мен Жонсни мағлуб этдим, гарчи дурангга рози бўлсам ҳам. Нима учун? Мен томошабинларни хурсанд қилдим, мухлислар буни кўриб қувонди».
Тайсон буни яна такрорлашга тайёрлигини таъкидлаган бўлса, Рой қўлқопларини кичик деталларигача намойиш қилди: уларда бинафша ва сариқ ранглар, рақамлар ҳамда Кобе Брайантнинг тасвирлари бор эди, чунки жанг Лос-Анжелесдаги «Staples Center» стадионида бўлиб ўтди, у ерда эса марҳум Кобининг жамоаси «Лейкерс» уй учрашувларини ўтказади.
Ҳар қандай ҳолатда ҳам Тайсон ва Жонс ўртасидаги беллашув ушбу кузда жаҳон боксидаги асосий жангга айланди. Уларнинг ҳар иккаласи WBC’дан Black Lives Matter камарини қабул қилди ва миллионлаб долларлик гонорарга эга чиқди (Майк 10 миллион доллар олган бўлса, Рой 3 миллионга эга чиқди). Шунингдек, улар ўз келажаги ҳақида ҳам суҳбатлашди. Кўриниб турибдики, улар ҳали пул ишлаш ва жамоатчиликни хушнуд этиш учун кўп имкониятларга эга бўлади.
Изоҳ (0)