Россияда идеал ҳолатдаги «Запорожец» иккита янги iPhone нархида сотувга қўйилди (фото)
Россиянинг Тула шаҳрида 1992 йилда ишлаб чиқарилган ва ҳозирга қадар 480 километр йўл босган «ЗАЗ-968МД» сотувга қўйилди. Деярли идеал ҳолатдаги ноёб «Запорожец»ни иккита iPhone 12 Prо нархига — 200 минг рублга (2600 доллар) харид қилиш мумкин, деб хабар беради Motor.
«ЗАЗ-968МД» модификацияси 1960 йиллар ўртасидан 1994 йилга қадар ишлаб чиқарилган. «Запорожец» имконияти чекланган инсонлар учун рул остидаги тутқичлар ёрдамида рул бошқаруви билан жиҳозланган. Автомобилда фақат «муфта» ва тормоз тепкилари бор. Шу турдаги моделларнинг аксарияти ижтимоий хизматлар орқали тарқатилган.
Сотувга қўйилган нусха деярли идеал ҳолатда. Фақат узоқ йиллар гаражда сақлангани сабаб пайдо бўлган «замбуруғлар» ҳисобга олинмаса, модель кузови бирор бир нуқсонсиз. Автомобиль интерьери жигарранг сунъий чарм билан қопланган, ойнасида эса «Ногирон» этикеткаси сақланиб турибди. Одометрга кўра, машина 28 йил давомида 480 километр йўл босган холос.
Орқа узатмали «ЗАЗ-968МД» 42 от кучига эга 1,2 литрли бензин двигатель ёрдамида ҳаракатга келади. Агрегат тўрт поғонали механик узатмалар қутиси ёрдамида бошқарилади. Сотувчи «вақт капсуласи»ни 200 минг рублга баҳолаган.
Аввалроқ Москвада Mazda базасида яратилган «Запорожец» сотувга қўйилгани, шунингдек, 34 йил гаражда турган «Запарожец» 6500 долларга баҳолангани тўғрисида хабар берилганди.
