«Гарри Поттер» фильмида Рон Уизли исмли қаҳрамон ролини ижро қилган актёр Руперт Гринт, Instagram оламида янги рекорд қўйди. Бу ҳақда BBC хабар берди, деб ёзади «Korrespondent.net».
Бундан бир ҳафта аввал Instagram’да саҳифа очган актёр, илк маротаба жажжи қизи билан тушган суратини жойлаган. Шундан кейин тўрт соат-у 1 дақиқа ичида унга 1 миллион киши обуначи бўлган. Бу эса Instagram’даги аввалги рекордларни янгилаган.
Бундан аввалги рекорд табиат ҳақидаги ҳужжатли фильмлари билан яхши таниш бўлган 94 яшар Дэвид Аттенборо томонидан қўйилган эди. У тўрт соат-у 44 дақиқада 1 миллион обуначи йиғган. Эндиликда Руперт етакчилик қиладиган энг қисқа вақтда бир миллион обуначига эга бўлган рекордсменлар орасида актриса Женнифер Энистон (5 соат, 16 дақиқа) учинчи, Малика Меган Маркл ва шаҳзода Гарри (5 соат, 45 дақиқа) тўртинчи ҳамда поп юлдузи Кан Даниэль (11 соат 36 дақиқа) бешинчи ҳисобланади. 12 соат натижа билан Рим папаси Франциск олтинчи ҳамда 24 соатда 1 миллион обуначига эга бўлган футбол юлдузи Дэвид Бекхем еттинчи бўлиб турибди.
Изоҳ (0)