АҚШда Кубага ёпирилган ҳалокатли тўфон вақтида ёзилган мактуб топилди

Флорида штатида яшовчи оила идиш ичидан Кубага ёпирилган ҳалокатли «Ирма» тўфони вақтида ёзилган мактубни топиб олди, деб хабар беради UPI.

Кети Бодифорд қариндошлари билан пляжда сайр қилиб юриб, ичида мактуб бор пластик идишни топиб олган. У пластикни қирқиб, ичидан мактубни эҳтиёткорлик билан олган. Маълум бўлишича, ушбу мактубни 2017 йилда бешинчи даражали тўфон ёпирилган вақтида кубалик болакай ёзган. «Мактубни кимдир топиб олишига, чин кўнгилдан умид қиламан», — дейилади хатда.

Мактуб муаллифи бутилкани циклон ёпирилган вақтда океанга ташламоқчи бўлган. «Болакай шу қадар жасур бўлгани ва кучли шамолга қарамай океанга боришдан қўрқмагани ҳайратланарли», — дейди Бодифорд.

Америкалик ўзининг топилмасини Facebook’даги саҳифасида эълон қилиб, унинг муаллифини топилишига умид қилмоқда.

«Ирма» тўфони 2017 йилнинг сентябрида Куба, Пуэрто-Рика, Доминикан ва АҚШга ёпирилган эди. У 55 кишининг ўлимига сабабчи бўлган.