Американинг Огайо штатидаги Патаскала шаҳрида яшовчи йигит бир йил-у уч ой мобайнида ўз услубига риоя қилган ҳолда 165 килограмм вазн йўқотди. Бу ҳақда Daily Mail хабар бермоқда.
23 ёшли Захари Манси болалигида ҳам ортиқча вазнга эга бўлган, аммо у ўрта мактабни тугатганидан сўнг оғирлиги назоратдан чиқиб кетган. Америкалик йигит нонушта, тушлик ва кечки овқатга фақатгина фастфуд егуликларини, яъни саккиз минг калория истеъмол қилган. Икки йил ичида у 127 килограмм вазн тўплаган. Вазнининг энг юқори палласида тарози 317 килограммни кўрсатган.
Кейинчалик Манси юришга ҳам қийнала бошлаган ва ногиронлар аравачасида ҳаракатланишга ўтган. 2019 йилга келиб, шифокорлардан бири унга семизлик эрта ўлимга олиб келиши мумкинлигини маълум қилган. Манси бундан қўрқиб кетиб, ҳаёт тарзини тубдан ўзгартиришга қарор қилган.
Энди у махсус парҳез ва жисмоний машқларга асосланган режимда кун кечиради. Манси бунинг учун севимли овқатларининг парҳезбоп вариантларини ишлаб чиқди ва газланган ичимликларни рациондан бутунлай чиқариб ташлади. «Менинг парҳезим фақатгина калорияни чеклайди. Мен кунига икки минг калория ва камида 140 грамм оқсил истеъмол қиламан», − дейди Манси.
У бир йил-у уч ой мобайнида паҳез ва машғулотлар ёрдамда 165 килограмм вазн йўқотди – бу унинг аввалги оғирлигининг ярмидан кўпини ташкил этади. Шу орқали унинг нафас қисиши муаммоси йўқ бўлди ва ўзи мустақил юришга одатланди. Манси парҳез қилишда давом этиб, 95 килограмм вазнга эришмоқчи. Унинг вазн йўқотишдаги яна бир асосий сири − дўстлар ва ҳамфикрларнинг қўллаб-қувватлашидир.
«Менинг ҳаётим бутунлай ўзгарди. Дўстларим, оилам ҳайратда, баъзилари мени ҳатто танимай қолди. Уларнинг барчаси мен билан фахрланади. Аксимни кўзгуда кўриб, бу мен эканлигимга ишонгим келмайди, лекин шу билан бирга ўзимни севишни ҳам ўрганяпман. Мен ҳаётимни қайтариб олдим», − дейди Манси. Шунингдек, вазн ташлагандан сўнг ҳосил бўлган ундаги ортиқча терини олиб ташлаш учун жарроҳлик амалиётини ўтказишга тўғри келмоқда.
Изоҳ (0)