Англиялик аёл биргина фото туфайли 38 кг вазн ташлади

Англиянинг Кент графлигида истиқомат қиладиган аёл оилавий фотода ўзини кўриб танимаган ва шундан кейин вазн ташлашга қарор қилган. Бу ҳақда Daily Mail’да маълум қилинган.

Икки фарзанднинг онаси бўлган 27 яшар Ленна Уэллснинг вазни 103 кг бўлган. У бундан беш йил аввал ҳомиладорлик вақтида нотўғри ва кўп овқатланиш сабаб семириб кетган.

2018 йилнинг декабрида Уэллс, тўй маросимидаги оилавий фотони кўриб, ортиқча вазни сабаб ўзини танимаган. «Ўша куни мен ўзимни ишончсиз ҳис қилдим ва шу сабаб ҳам зиёфатдан эрта кетдим. Бошқалар менга қарашини истамадим», — деган Ленна.

У камерадан яширинишга ҳаракат қилган ва суратга тушишдан бош тортган, шунга қарамай умумий кадрлардан бирига сурати муҳрланган.

У суратда бегона одамни кўргандек бўлган ва ўзини ёмон ҳис қилган ва шундан кейин ўзгаришларга тайёр эканини тушуниб етган.

Уэллс, 2019 йилнинг январида вазн ташлаш дастурларига қўшилган. У учун ишлаб чиқилган овқатланиш дастурига амал қилган ҳолда 32 кг вазн ташлаган. Сўнгра тренажёр залида спорт билан шуғулланган ва озишда давом этган.

«Авваллари мен, ўзимни хурсанд қилиш учун еб кейин афсусланардим. Ўзгаришим мумкин, деб ҳеч қачон ўйламаганман. Мен одамларга бунинг имкони борлиги ва улар ҳам озиши мумкинлигини исботлашни истайман», — деб қўшимча қилган аёл.