Шаҳрихонда Spark маст пиёдани уриб кетди. Жабрланувчи шифохонада вафот этган

2020 йил 12 ноябрь куни Андижон вилояти Шаҳрихон туманида Spark ҳайдовчиси маст ҳолда йўлда ётган пиёдани уриб юбориб, йўл транспорт ҳодисаси содир этган. Бу ҳақда ЙҲХББ хабар қилган.

Хабарга кўра 12 ноябрь куни соат 19:30 ларда 4Р-139 Шаҳрихон—Қува автомобиль йўлининг 2-километрида ЙТҲ содир бўлган.

Андижон вилояти ИИБ ЙҲХБ бошлиғи Саидолим Зингировнинг айтишича автоҳалокатга Spark ҳайдовчисининг ёмғир остида келиб бошқарувни йўқотгани, пиёданинг эса маст ҳолда йўлда бемақсад ётгани сабаб бўлган.

Шаҳрихон тумани ҳокими Ҳикматулло Дадахонов ЙТҲ ўзи раҳбарлигидаги сектор ҳудудида содир бўлгани туфайли воқеа жойига етиб келгани ва шифохонага ҳам борганини айтиб ўтган.

Spark ҳайдовчиси Л.Э. йўлда келаётган вақтида кўчада пиёданинг ётганини кўргани, аммо рул чамбарагини буришга улгурмагани, оқибатда маст эркакни туртиб юборганини тан олган. Шунингдек, воқеа содир бўлган куни ёмғир ёққани туфайли кўриш қобилияти пасайгани, йўлдаги устунлардаги чироқлар ҳам ёқилмаганини, ҳодисадан кейин жабрланувчини шифохонага олиб борганини айтган.

Видеолавҳада ҳодиса юзасидан «Бешариқ» МФЙ раиси Шавкат Оҳунов, Шаҳрихон тумани йўллардан фойдаланиш унитар корхонаси раҳбари Равшан Ҳусанов, Электр тармоқлари корхонаси бош муҳандиси Музаффар Каримов ҳам фикр-мулоҳазаларини билдириб ўтган.