Шимолий Корея етакчиси Ким Чен Ин сўнгги 25 кун ичида биринчи марта омма олдида кўриниш берди. «РБК»нинг Yonhap агентлигига таяниб хабар беришича, у Корея Ишчилар партияси сиёсий бюросининг кенгайтирилган йиғилишида иштирок этди.

Фото: Reuters

Йиғилишда Ким Чен Ин қатнашгани ҳақида Корея Марказий телеграф агентлиги (КМТА) маълум қилган. Унда мамлакат соғлиқни сақлаш тизимини мустаҳкамлаш ва коронавирус пандемияси фонида эпидемияга қарши чоралар муҳокама қилинган.

Мавзуга доир: ОАВ: Шимолий Корея COVID-19’га қарши курашиш учун чегараларини миналаштирди

Хабарда айтилишича, Ким Чен Ин сўнгги марта октябрь ойининг охирларида оммага кўриниш берган. Ўшанда КХДР етакчиси Корея урушида қатнашган хитойлик аскарлар дафн этилган Жанубий Пхенян провинциясидаги қабристонни зиёрат қилган.

Бу ҳақдаги хабар 22 октябрь куни эълон қилинган. КХДРнинг давлат ОАВлари одатда ўз раҳбарининг хатти-ҳаракатлари тўғрисида одатда эртаси куниёқ хабар беради, деб ёзмоқда агентлик.

Бунга қадар Ким Чен Ин баҳорда икки марта кўринмай кетганди. Апрель ойида у 10 кун жамоатчиликка кўриниш бермаган, шу жумладан Ким Чен Иннинг бобоси бўлган КХДР асосчиси Ким Ир Сен туғилган куни муносабати билан ўтказилган анъанавий тантанали маросимда иштирок этмаган. ОАВлар Шимолий Корея етакчисининг узоқ вақт кўринмай қолганини унинг соғлиғи билан бўлиқ бўлиши мумкин, деб тахмин қилган.

Мавзуга доир: Жанубий Корея ОАВлари Ким Чен Иннинг рафиқаси бир неча ойдан буён омма олдида кўриниш бермаганига эътибор қаратди