Руминия шимоли-шарқида жойлашган Пьятра-Нямц шаҳрида коронавирус инфекциясига чалинган беморларни даволовчи шифохонада ёнғин келиб чиқиши оқибатида 10 киши ҳалок бўлди. Бу ҳақда Associated Press хабар қилган.
Агентлик берган маълумотларга кўра, яна 10 нафар одам турли даражадаги тан жароҳатлари олган. Жароҳатланганларнинг етти нафари оғир аҳволда экани айтилмоқда. Ёнғин оқибатида беморларни қутқаришга уринган навбатчи шифокор биринчи даражали куйиш жароҳатларини олган.
Ёнғин COVID-19 беморларини даволовчи тезкор терапия палатасидан бошланган. Руминия соғлиқни сақлаш вазирлиги ёнғинга электр тармоқларидаги қисқа туташув сабаб бўлганини билдирган. Associated Press’нинг қайд этишича, шифохона биносининг аҳволи қониқарсиз ҳолатда бўлган.
Баҳорда Россиянинг Москва ва Санкт-Петербург шаҳарларида ҳам COVID-19 беморлари даволанаётган шифохоналарда ёнғинлар содир бўлган. Оқибатда пойтахтда бир нафар, Санкт-Петербургда эса беш нафар бемор вафот этган. Ёнғинлар келиб чиқишига ўпкага сунъий ҳаво етказиб бериш аппаратларидаги носозликлар сабаб бўлгани хабар қилинганди.
Ушбу воқеалардан кейин Росздравнадзор «Авента-М» аппаратларини ишлатишни тўхтатган, бироқ текширувлардан кейин маълум вақт ўтгач, тақиқ бекор қилинган уларнинг фойдаланилиши учун рўйхатдан ўтказилгани ҳақида гувоҳнома берилганди.
Изоҳ (0)