Чехиялик эркак ўрмонга қўзиқорин тергани бориб, эрамиздан олдинги XIV асрга оид қилич топиб олди

Чехиянинг Есеник шаҳрида истиқомат қилувчи эркак ўрмонга қўзиқорин тергани бориб, у ердан қадимий қиличга дуч келди, деб ёзади Euro Weekly News.

Роман Новак ёмғирдан сўнг, уй яқинидаги ўрмонга қўзиқорин териш учун чиққан ва ерда ётган ноодатий буюмга дуч келган. Эркак уни оёғи билан тепган ва бу қадимий қиличнинг бир қисми эканлигини тушунган. Унинг яқинидан бронзадан ишланган болта ҳам топилган

Новак иккала топилмани ҳам археологларга олиб борган. Мутахассислар, ушбу артефактлар эрамиздан олдинги XIV асрга тегишли эканлигини ва Германиядан топилган бронза даврига оид қуролларга ўхшашини маълум қилган. Бронза қиличлар металлни эритиш ва уни қолипга қуйиш орқали ясалган.

Рентген металлдаги майда пуфакларни кўрсатган. Бу эркак томонидан топилган қуролдан урушларда фойдаланилмагани ва фақат рамзий маънога эга бўлганидан далолат беради.

Есеник этнографик музейидан бўлган Милан Рихлининг таъкидлашича, мутахассислар бошқа артефактларни ҳам топиш илинжида ўрмонни тадқиқ этиш ниятида.