Andijonda COVID-19 tahlili natijalarini qalbakilashtirib sotayotgan guruh qo‘lga olindi

Andijonda DXX viloyat boshqarmasi hamda Bosh prokuratura huzuridagi iqtisodiy jinoyatlarga qarshi kurashish departamenti xodimlari COVID-19 infeksiyasi natijalarini qalbakilashtirib sotayotgan uyushgan guruhni qo‘lga oldi. Bu haqda “Daryo” muxbiri Umidjon Mamarasulov xabar berdi.

Ma’lum qilinishicha, “Do‘stlik-avto” chegara bojxona posti orqali bir sutkada Qirg‘izistonga o‘tib qaytayotgan besh mingga yaqin yo‘lovchilardan koronavirusga test topshirgani haqidagi natijalar talab qilinmoqda. Ushbu ma’lumotnomani olish uchun 190 ming so‘m to‘lanib, test topshiriladi va natija olti soatda chiqadi. O‘tib qaytuvchilarda shu ma’lumotnomaga ehtiyoj borligini bilgan jinoiy guruh esa COVID-19 infeksiyasining ijobiy natijasini 150 ming so‘mdan sotishni yo‘lga qo‘ygan.

Aniqlanishicha, qalbakilashtirilgan ma’lumotnomalar Andijon va Farg‘ona viloyatlari, Qo‘rg‘ontepa tumani sanitariya-epidemiologiya osoyishtalik markazlari, “Shedevr Denta Med” xususiy diagnostika markazi, “Farm standart lyuks” MChJ, Andijon davolash diagnostika markazi blankalariga chop etilgan va muhri urilgan holda sotilgan.

Namangan viloyatining Norin tumanida yashovchi A.S., Andijon shahrida yashovchi S.K., Andijon tumanida yashovchi O.B. va boshqa shaxslar yuqoridagi tibbiyot muassasalarining blankalarini 75 ming so‘mdan sotib olib, mijozga oid ma’lumotlarni qo‘lda yozgan holda 150 ming so‘mdan sotib kelgan.

Ushbu holat COVID-19 infeksiyasi bilan bog‘liq epidemiologik vaziyatning keskinlashuviga sabab bo‘lishi inobatga olinib, DXX viloyat boshqarmasi hamda Bosh prokuratura huzuridagi iqtisodiy jinoyatlarga qarshi kurashish departamentining Xo‘jaobod tuman bo‘limi xodimlari tomonidan tadbir o‘tkazilgan.

Tadbir natijalariga ko‘ra, Qo‘rg‘ontepa tumanida yashovchi B.A. to‘rtta qalbakilashtirilgan test natijalari to‘g‘risidagi ma’lumotnomalarni 800 ming so‘m evaziga sotayotgan vaqtida qo‘lga olingan. Shuningdek, B.A.ning og‘zaki arizasi va ko‘rsatmalari asosida tadbir davom ettirilib, Qo‘rg‘ontepa tumanida yashovchi R.R. qalbakilashtirilgan to‘rtta ma’lumotnomaning har birini 150 ming so‘mdan sotayotgan vaqtida ushlangan. Surishtiruvlar davomida R.R. Qo‘rg‘ontepa tumani davlat sanitariya-epidemiologiya osoyishtaligi markazi muhri tushirilgan ma’lumotnomalarni ushbu markazning Dilafruz ismli xodimi orqali har birini 70 ming so‘mdan sotib olgan.

2020-yilning 6-noyabr kuni Qo‘rg‘ontepa DSEOM sanitariya-gigiyena xizmati laboranti D.S. avval sotgan ma’lumotnomalari uchun 500 ming so‘m pul va to‘rtta muhrlangan ma’lumotnoma uchun 200 ming so‘m, jami kimyoviy ishlov berilgan 700 ming so‘m pulni olayotgan paytida ushlangan.

D.S. ham ma’lumotnomalarni DSEOM kotibasi G.U.dan har biri uchun 30 ming so‘mdan berib, sotib olayotganini ma’lum qilgach tadbir davom ettirilib, G.U. markazga yaqin hududda D.S.dan avval olgan ma’lumotnomalari uchun 500 ming so‘mni olayotgan vaqtida qo‘lga olingan.

Mazkur holat yuzasidan hozirda departamentning Xo‘jaobod tuman bo‘limi tomonidan dastlabki surishtiruv tadbirlari olib borilmoqda.